वासुदेव गायतोंडेंवरील इंग्रजी पुस्तकात उचलेगिरी!

अशोक वाजपेयींसह सहा जणांविरोधात एफआयआर

मटा ऑनलाइन वृत्त । ठाणे

जगविख्यात चित्रकार वासुदेव गायतोंडे यांच्या जीवनावर आधारित इंग्रजी पुस्तक वादाच्या भोवऱ्यात सापडलं आहे. गायतोंडेंवरील मूळ मराठी ग्रंथाची निर्मिती करणारे चित्रकार आणि ज्येष्ठ पत्रकार सतीश नाईक यांनी आपल्या मजकुराची व छायाचित्रांची 'उचलेगिरी' करण्यात आल्याची तक्रार भिवंडीतील नारपोली पोलीस ठाण्यात केली असून त्याआधारे पुस्तकाच्या लेखिका, प्रकाशक, संपादक यांच्यासह सहा जणांविरोधात कॉपीराइट भंगाचा गुन्हा दाखल करण्यात आला आहे.

गायतोंडे यांच्यावरील 'सोनाटा ऑफ सॉलिट्युड: वासुदेव संतू गायतोंडे' या इंग्रजी पुस्तकाचे प्रकल्प संचालक जेसल ठक्कर (बोधना आर्ट्स अॅण्ड रिसर्च फाउंडेशन), लेखिका मीरा मेनेंझिस, सहप्रकाशक रझा फाउंडेशनचे विश्वस्त, प्रसिद्ध हिंदी कवी अशोक वाजपेयी, संपादक जेरी पिंटो, प्रकल्प संपादक अभिजीत रणदिवे, मनोज नायर यांच्याविरोधात पोलिसांनी कॉपीराइट कायदा १९५५ च्या कलम ६३ अन्वये हा गुन्हा दाखल केला आहे.

गायतोंडे यांच्यावरील इंग्रजी पुस्तकात मराठीत आधीच प्रकाशित करण्यात आलेल्या पुस्तकातील काही मजकूर जशास तसा भाषांतरीत करून वापरण्यात आला आहे. कोणतीही लेखी वा तोंडी परवानगी न घेता मूळ पुस्तकातील छायाचित्रेही वापरण्यात आली आहेत, असे फिर्यादी सतीश नाईक यांनी आपल्या तक्रारीत नमूद केले आहे. त्याआधारेच पोलिसांनी एफआयआर दाखल केला आहे.

खटला भरण्याची धमकी

सतीश नाईक यांनी संपादित केलेल्या 'गायतोंडे' ग्रंथाचे यंदाच्या जानेवारी महिन्यात मुंबई विद्यापीठाच्या दीक्षांत सभागृहात गानसरस्वती किशोरी आमोणकर यांच्या हस्ते प्रकाशन झाले. त्यानंतर महिनाभराने गायतोंडेंवरील इंग्रजी पुस्तकाचे प्रकाशन झाले. या पुस्तकात मराठी ग्रंथातील मजकूर व फोटो परस्पर वापरण्यात आल्याचे लक्षात आल्यानंतर आपण जेसल ठक्कर यांना मेल केला व त्यांनी कॉपीराइट कायद्याचा भंग केल्याची बाब निदर्शनास आणून दिली. मात्र त्या मेलला दिलेल्या उत्तरात उलट माझ्यावरच अब्रू नुकसानीचा खटला भरण्याची धमकी देण्यात आली. लेखिका मीरा आणि सहप्रकाशक वाजपेयी यांनाही मी मेल पाठवला होता. पण त्यांच्याकडूनही कोणताच प्रतिसाद मिळाला नाही, असे सतीश नाईक यांनी तक्रारीत नमूद केले आहे.