म. टा. वृत्तसेवा, कल्याण
दरवर्षी उन्हाळ्यात आधारवाडी डम्पिंग ग्राऊंडला लागणाऱ्या आगीमुळे परिसरातील नागरिकांना प्रदूषणाचा सामना करावा लागतो. यंदा मात्र डम्पिंगच्या आगीपासून काहीशी सुटका मिळाली, असे वाटत असतानाच शनिवारी दुपारी २ वाजण्याच्या सुमारास आधारवाडी डम्पिंगने पेट घेतला. कडाक्याचे उन आणि सुटलेला सोसाट्याचा वारा यामुळे आगीवर नियंत्रण मिळविताना प्रचंड त्रास होत असल्याचे अग्निशमन दलाच्या अधिकाऱ्यांनी सांगितले. तब्बल आठ अग्निशमन वाहनांसह जवान आगीवर नियंत्रण मिळविण्यासाठी शर्थीचे प्रयत्न करत आहेत, परंतु आग पसरत आहे
या आगीचे नेमके कारण समजू शकले नाही. खाडीकिनारी परिसरात जोरदार वाहणाऱ्या वाऱ्यांमुळे ही आग पसरत चालल्याची माहिती प्रत्यक्षदर्शींनी दिली. डम्पिंगला चारही बाजूंनी वेढत चाललेल्या भीषण आगीचा धूर थेट खडकपाडा, चिकणघरपर्यंत पोहोचला. कचऱ्यात खोलवर पोहोचलेली आग पूर्णपणे विझविण्याचे आव्हान अग्निशमन दलासमोर उभे ठाकले आहे. डम्पिंग ग्राऊंडलगत महानगर गॅस कंपनीचा सीएनजीचा पेट्रोल पंप आहे. आगीच्या झळा या पंपापर्यंत पोहोचू नयेत, यासाठी अग्निशमन दलाचे कर्मचारी आणि केडीएमसी प्रशासनाकडून शर्थीचे प्रयत्न सुरू आहेत.