फुलविक्रेत्यांचा उपोषण इशारा

कल्याण ः कल्याण कृषी उत्पन्न बाजार समितीमधील दुरवस्था झालेले फुल मार्केट विकसित करण्यास बाजार समितीला परवानगी देण्यात आली असून यातील महापालिकेच्या २१६ ओटेधारकांना विनामूल्य सामावून घेण्यात यावे, अशी या ओटेधारकांची मागणी आहे. मात्र विश्वासात न घेता किंवा करार न करताच जुनी शेड तोडण्याची तयारी कृषी उत्पन्न बाजार समितीने केल्याचा आरोप करत ४ दिवसांत न्याय न मिळाल्यास तहसील कार्यालयासमोर बेमुदत उपोषण छेडण्याचा इशारा या ओटेधारकांनी दिला.

फुल मार्केटमध्ये ४१२पैकी पालिकेचे २१६, तर बाजार समितीचे १९६ ओटेधारक आहेत. पालिकेच्या भाडेकरूंनी १३ वर्षांपूर्वी या ओट्यासाठी ११ हजार ७०० रुपये अनामत रक्कम भरून हे गाळे २० वर्षांच्या कराराने घेतले असून ही अनामत रक्कम पालिकेकडे जमा आहे. यामुळेच नव्याने बांधल्या जाणाऱ्या फुल मार्केटमध्ये पालिकेच्या ओटेधारकांना विनामोबदला ओटे मिळावेत, अशी मागणी केली जात आहे.