प्रा. जगदीश संसारे यांचे प्रतिपादन
म. टा. वृत्तसेवा, वसई
'पथनाट्याच्या माध्यमातून विविध सामाजिक समस्यांमध्ये आपण हात घालतो. पथनाट्यामार्फत प्रबोधन करतो त्यामुळे समाजाचे विविध प्रश्न सोडवण्याचे बळ पथनाट्यामुळे आपल्याला मिळते,' असे प्रतिपादन प्रा. जगदीश संसारे यांनी वसईत केले.
वसईतील संत गोन्सालो गार्सिया कॉलेजचे एनएसएसचे सातदिवसीय विशेष निवासी शिबीर खोचिवडे गावात सुरू करण्यात आले आहे. या शिबिरात स्वयंसेवक विद्यार्थ्यांना मार्गदर्शन करण्यासाठी प्राचार्य डॉ. सोमनाथ विभुते उपस्थित होते. तर एनएसएसचे स्वयंसेवक पारंगत व्हावेत, या उद्देशाने राष्ट्रीय सेवा योजनेचे पालघर जिल्हा समन्वयक प्रा. जगदीश संसारे यांचे पथनाट्य मार्गदर्शन शिबीर आयोजित करण्यात आले होते.
यावेळी प्राचार्य डॉ. सोमनाथ विभुते म्हणाले की, जीवनाच्या कोणत्याही क्षेत्रात यशस्वी व्हायचे असेल तर लक्ष्य केंद्रित करणे अधिक गरजेचे असते. लक्ष्य चुकले तर अपयश पदरी येते आणि मग आपण निराश होतो. त्यांनी यावेळी सांगितलेल्या राम्याचा न्यायमूर्ती रामशास्त्री प्रभुणे कसा झाला, या रामशास्त्री यांच्या जीवन कहाणीने उपस्थित स्वयंसेवक विद्यार्थी प्रभावित झाले. कॉलेजचे कार्यक्रम अधिकारी डॉ. प्रा. रामदास तोंडे म्हणाले, 'आजच्या कार्यशाळेतील पथनाट्याच्या मार्गदर्शनामुळे आमचे विद्यार्थी उत्तम पथनाट्य तयार करू शकतील.' तसेच, यावेळी प्रा. जगदीश यांनी विविध खेळ आणि प्रात्यक्षिके घेऊन पथनाट्याचे सर्वांगीण मार्गदर्शन उपस्थित स्वयंसेवक विद्यार्थ्यांना केले. ५०पेक्षा अधिक स्वयंसेवकांनी पथनाट्य शिबिरात सहभाग नोंदवला. कॉलेजचे माजी स्वयंसेवक परीक्षित शेठ, सुमित गोरले तसेच रवींद्र राऊत यांनीदेखील शिबिरात हजेरी लावली होती.