सभागृहात चार दाम्पत्यांचा प्रवेश

म. टा. वृत्तसेवा, उल्हासनगर

उल्हासनगर महापालिकेतील पती-पत्नी दोघेही विजयी झाल्याचा इतिहास यंदाही कायम राहिला. यंदा पती-पत्नीच्या चार जोड्या सभागृहात प्रवेश करणार आहेत. यात सर्वाधिक दाम्पत्य युतीचे आहेत. चारपैकी तीन दाम्पत्य शिवसेनेचे आहेत. प्रभाग ७ मधून रिपाइंच्या भागवान भालेराव आणि अपेक्षा भालेराव हे पती-पत्नी विजयी झाले. अपेक्षा भालेराव पहिल्यांदा सभागृहात प्रवेश करणार आहेत.

शिवसेनेच्या प्रभाग ३मधील राजेंद्र भुल्लर आणि चरणजीत कौर भुल्लर, प्रभाग १०मधून राजेंद्र चौधरी आणि राजश्री चौधरी आणि प्रभाग क्रमांक १५ मधून धनंजय बोडारे आणि वसुधा बोडारे हे पती-पत्नी सभागृहात पाहायला मिळणार आहेत. पॅनल २०मधून आकाश आणि विकास या भावांची जोडीही सभागृहात प्रवेश करणार आहे. यंदाच्या निवडणुकीत साई पक्षाचे जीवन इदनानी आणि माजी महापौर आशा इदनानी हेही निवडणूक रिंगणात होते. मात्र प्रभाग क्रमांक ९मधून आशा इदनानी यांना पराभवाला सामोरे जावे लागले आहे. त्याचवेळी प्रभाग ११मधून जीवन इदनानी विजयी झाले आहेत. मात्र गेल्या वर्षीप्रमाणे इदनानी पती-पत्नीची जोडी सभागृहात पाहायला मिळणार नाही. आरपीआयमधील पॅनल १२मधील माजी उपमहापौर पंचशीला पवार आणि नाना पवार या दाम्पत्याचा पराभव झाला.