म. टा. वृत्तसेवा, ठाणे
खासगी बँका, फायनान्स कंपन्यांचे कर्जाचे व्याजदर अधिक असल्याने कमी व्याजात कर्ज मिळवण्यासाठी अनेकांची धडपड सुरू असते. त्यात शून्य व्याजाने कोणी कर्ज देत असल्यास सोन्याहून पिवळे. याच गोष्टीचा ठग मंडळी फायदा घेत असून कर्जाचे आमिष दाखवून फसवणूक करत असल्याचे प्रकार वाढले आहेत. भिवंडीत असाच एक फसवणुकीचा प्रकार समोर आला आहे. तिघांनी मिळून व्यावसायिकाला एक लाखाचा गंडा घातला आहे.
भिवंडीतील भादवडमध्ये राहणारे योगेश भाकरे (३८) यांना दिल्ली येथील एका फायनान्स कंपनीतून फोन आला होता. तसेच, व्हॉट्सअॅप मेसेजही केले होते. शून्य व्याजाने कर्ज देतो, परंतु अगोदर १५ लाखांची पॉलिसी काढण्याची अट आहे, त्यासाठी आवश्यक कागदपत्रे पाठवावी लागतील, अशी माहिती देण्यात आली. या फोननंतर पुन्हा ३ सप्टेंबर रोजी कंपनीच्या तपासणी विभागातून फोन आला. तुमच्या कागदपत्रांची पडताळणी झाली असून १५ लाख रुपये कर्ज मिळेल, असेही सांगण्यात आले आणि तीन टप्प्यांत एनओसी शुल्क भरण्याबाबत सांगून एकूण एक लाख रुपये भामट्यांनी भाकरे यांच्याकडून उकळले होते. त्यांनी ऑनलाइन पैसे आरोपीने दिलेल्या बँक खात्यात भरले. मात्र कर्ज काही मिळाले नाही. फसवणूक झाल्याचे लक्षात येताच भाकरे यांनी शांतीनगर पोलिस ठाण्यात धाव घेत तक्रार केल्याने रजत, तुषार आणि नेहा या तिघांविरुद्ध फसवणुकीचा गुन्हा दाखल करण्यात आला आहे.