म. टा. खास प्रतिनिधी, कल्याण
लाचखोरीच्या प्रकरणात अटक झालेले केडीएमसीचे अतिरिक्त आयुक्त संजय घरत यांच्यावरील कारवाई प्रकरणी अखेर लाचलुचपत प्रतिबंधक विभागाने सोमवारी आपला अहवाल केडीएमसीकडे सादर केला. पालिका आयुक्त गोविंद बोडके यांनी या माहितीला दुजोरा दिला. या अहवालामुळे घरत यांच्या निलंबनाचा मार्ग तांत्रिकदृष्ट्या मोकळा झाला असुन सोमवारी सायंकाळी उशिरा किंवा मंगळवारी सकाळी त्यांच्या निलंबनाचे आदेश दिले जातील, अशी माहिती आयुक्तांनी 'महाराष्ट्र टाइम्स' ला दिली.
दुपारपासून गोविंद बोडके हे नियोजित वेळापत्रकानुसार, डोंबिवली येथील विभागीय कार्यालयात होते. तोपर्यंत कल्याण येथील मुख्यालयात लाचलुचपत प्रतिबंधक विभागाकडून कारवाईचा अहवाल दाखल झाला. त्यामुळे सोमवारी कार्यालयीन कामकाजाच्या वेळेतच घरत यांच्या निलंबनाचे आदेश निघतील, अशी अपेक्षा होती. पण प्रत्यक्षात तसे झालेले नाही. १३ जून रोजी संजय घरत यांना ८ लाख रुपयांची लाच घेताना लाचलुचपत प्रतिबंधक विभागाच्या पोलिसांनी सापळा रचून त्यांच्या दालनातच अटक केली होती. तेव्हापासून ते पोलिस कोठडीत आहेत. चौकशीसाठी कल्याण सत्र न्यायालयाने दिलेली पोलिस कोठडीची मुदत मंगळवारपर्यंत आहे. या चौकशीत नेमके काय निष्पन्न होते तसेच घरत यांनी लाचखोरीतून काही अपसंपदा जमा केली आहे का याच्या तपशीलाकडे पालिका वर्तुळाचे लक्ष लागले आहे. दरम्यान, चौकशीसाठी काही हॉटेल व्यावसायिकांनाही पोलिसांनी बोलवल्याचे वृत्त असून घरत यांच्या दालनात एरवी नेहमी उठबस असणाऱ्यांची माहिती पोलिसांकडून घेतली जात आहे. दरम्यान, घरत यांना अटक झाल्यापासून तब्बल पाच दिवसांनंतरही त्यांचे निलंबन झाले नसल्याने लाचलुचपत प्रतिबंधक विभाग व केडीएमसी यांच्यावर याप्रकरणात कोणाचा दबाव आहे का यावरून उलटसुलट चर्चेला उधाण आले आहे.