लोकप्रतिनिधींचा आरोप; नगरसेवकांनी प्रशासनाला धरले धारेवर
म. टा. प्रतिनिधी, ठाणे
अनेक प्रकल्पांवर कोट्यवधी रुपयांची उधळपट्टी करणारे ठाणे महापालिका प्रशासन पालिका शाळांमध्ये आयोजित होणाऱ्या क्रीडा स्पर्धांसाठी तुटपुंजा निधी देत असल्याचा आरोप लोकप्रतिनिधीच करू लागले आहेत. निधी पुरत नसल्याने शिक्षकांना नगरसेवक, संस्थेकडे हात पसरावे लागत आहेत. नुकत्याच झालेल्या पालिकेच्या सर्वसाधारण सभेतही निधीवरून नगरसेवकांनी प्रशासनाला चांगलेच धारेवर धरले होते. क्रीडा स्पर्धांसाठी असलेल्या निधीच्या रकमेत वाढ करण्याविषयी शिक्षण विभागाने प्रयत्न चालू केल्याचे समजते, मात्र खेळांच्या प्रती पालिका उदासीन असल्याने भविष्यात शाळांतून उत्तम खेळाडू कसे घडतील, हा मोठा प्रश्न आहे.
पालिका शाळांमध्ये शिक्षण घेणाऱ्या विद्यार्थ्यांच्या कलागुणांना वाव मिळावा, यासाठी प्रशासनाकडून नानाविध उपक्रम राबवले जात आहेत. सांस्कृतिक कार्यक्रमापासून खेळ तसेच इतरही कार्यक्रम आयोजित केले जात असून जेणेकरून भविष्यात पालिका शाळांमधील विद्यार्थी चमकदार कामगिरी करतील. स्वतः बरोबर ठाण्याचेही नाव उंचावतील. शाळा डिजिटल करण्याकडे प्रशासनाने भर दिला आहे. त्यासाठी तब्बल साडेसहा कोटी रुपये खर्च करण्यात येणार आहे. डिजिटल शाळांमुळे विद्यार्थ्यांचा शैक्षणिक दर्जा उंचावण्याचा दावा करण्यात येत आहे. दुसरीकडे शाळांमध्ये चांगल्या सुविधा पुरवण्याकडे प्रशासन दुर्लक्ष करत आहे. शाळांची दुरुस्ती रखडली असून एका वर्गात दोन ते तीन वर्ग भरतात. शिक्षकांची कमतरता आहे. शाळांमधील शिक्षकांच्या गुणवत्तेवरच प्रश्नचिन्ह उपस्थित होत असताना पालिका शाळांमध्ये आयोजित होणाऱ्या क्रीडा स्पर्धांसाठी पुरेसा निधी उपलब्ध केला जात नसल्याचा आरोप लोकप्रतिनिधी करू लागले आहेत. नुकत्याच झालेल्या पालिकेच्या सर्वसाधारण सभेतही निधीचा मुद्दा काही लोकप्रतिनिधींनी उपस्थित केला. खेळांसाठी खूपच कमी निधी दिला जात असल्याने निधीसाठी संस्थेकडे हात पसरण्याची वेळ येऊ लागली आहे. काही शाळांमधील विद्यार्थी एकत्र आणून स्पर्धा घेतल्या जातात. सात हजारांमध्ये मंडप, खुर्च्या इत्यादींचा खर्च कसा काय भागवणार, असेही नगरसेवकांचे म्हणणे होते.
स्वतः येऊन याबाबत पाहणी करा, असे शिक्षण विभागाच्या अधिकाऱ्यांना नगरसेवकांनी सांगितले. नगरसेवकांच्या प्रश्नावर उत्तर देताना शिक्षण विभागाच्या उपायुक्तांनी ही सर्व वस्तुस्थिती मान्य करत लोकप्रतिनिधींनी केलेल्या सूचनांची नोंद घेण्यात येईल, असे आश्वासन सर्वसाधारण सभेत दिले. महापौर नरेश म्हस्के यांनी तुटपुंजा निधीवरून नाराजी व्यक्त केली. क्रीडा स्पर्धांसाठी तुटपुंजा निधी देत असल्यामुळे शिक्षक नगरसेवक, लोकांकडे पैसे मागायला जात असल्याचा आरोप महापौरांनी केला. त्यामुळे खेळासाठी निधी उपलब्ध करून द्या, अशी सूचना प्रशासनाला केली, परंतु डिजिटल शाळांवर पालिका प्रशासन कोट्यवधी रुपये खर्च करत असली, तरी खेळांसाठीच्या निधीमध्ये हात आखडता घेत असल्याचे समोर आले आहे. त्यामुळे राष्ट्रीय, आंतराष्ट्रीय पातळीवर पालिकेतील गुणवान खेळाडू चमकणार कसे, हाही प्रश्न निर्माण झाला आहे.
वेगवेगळ्या गटांनुसार शाळांमध्ये खेळ घेतले जातात. एका गटात १० ते १५ शाळा असतात. एका गटासाठी सुमारे दहा हजारांचा निधी दिला जात असून या निधीमधून साहित्य आणि इतर गोष्टींवर खर्च करण्यात येतो. तसा हा निधी पुरेसा आहे, मात्र अर्थसंकल्पात निधीमध्ये आणखी वाढ करण्यात येईल.
- राजेश कंकाळ, शिक्षणाधिकारी, ठाणे महापालिका