पनवेलमध्ये पुन्हा कचराकोंडी

आयुक्त काम करू देत नसल्याची कंत्राटदाराची तक्रार

म. टा. वृत्तसेवा, पनवेल

पगार दिला नाही म्हणून घंटागाडी कामगारांनी पनवेल शहरातील कचरा उचलणे बंद केल्यामुळे महापालिका आयुक्त डॉ. सुधाकर शिंदे यांनी पालिकेचे मनुष्यबळ वापरून शहरातील कचरा उचलून साफसफाई करण्यास गुरुवार सायंकाळपासून सुरुवात केली. त्यानंतर वठणीवर आलेल्या कंत्राटदाराने शुक्रवारपासून कचरा उचलण्यास सुरुवात केली खरी, मात्र ‘तळोजा येथील सिडकोच्या डम्पिंग ग्राऊंडमध्ये कचरा टाकण्यास तुम्ही मनाई केल्यामुळे कामगारांना नाईलाजास्तव पुन्हा काम बंद करावे लागले आहे,’ अशी आयुक्तांविरोधात लेखी तक्रार समीक्षा कन्स्ट्रक्शनचे मालक राठोड यांनी आयुक्तांकडेच शुक्रवारी केली. त्यामुळे पुन्हा कंत्राटदाराने कचरा उचलणे थांबवल्यामुळे कंत्राटदार आणि पालिकेच्या भांडणात पनवेलकरांना कचऱ्यांचा सामना करावा लागतो आहे.

तत्कालीन नगरपालिकेने पनवेल शहरातील कचरा उचलण्यासाठी समीक्षा कन्स्ट्रक्शन या कंपनीला कंत्राट दिले आहे. कंपनीच्या कामात अनेक त्रुटी आढळल्यामुळे मागील काही महिन्यांत त्यांच्यावर दंडात्मक कारवाईही झाली आहे. याशिवाय मागील चार महिन्यांपासून कंत्राटदाराचे सुमारे ७२ लाख रुपयांचे बिल देण्यात आलेले नाही. कामातील तक्रारी, कंत्राटात नमूद केलेल्या यंत्रसामुग्री न वापरणे अशा तक्रारींमुळे कंत्राटदाराच्या कामाची तपासणी सुरू असल्याचे कारण आयुक्त डॉ. सुधाकर शिंदे यांनी सांगितले आहे.

मागील महासभेतही कंत्राटदारांच्या तक्रारीवर जोरदार चर्चा झाली होती. महापालिकेने चार महिन्यांचे बिल न दिल्यामुळे कामगारांचा पगार करू शकलो नाही, म्हणून कामगारांनी काम बंद केल्याचे कंत्राटदार रवींद्र राठोड यांचे म्हणणे होते. बुधवारपासून काम बंद केल्याचा परिणाम शहरातील अस्वच्छतेवर झाला. अनेक ठिकाणी कचऱ्याचे ढीग साचू लागले. घंटागाडी कामगार त्यांच्या भूमिकेवर ठाम असल्याचे समजल्यावर आयुक्तांनी महापालिकेच्या कामगारांकडून कचरा उचलण्यास गुरुवारपासून सुरुवात केली.

काम बंद करूनही आपले बिल मिळाले नाही, महापालिका स्वत: कचरा उचलू लागल्याचे समजल्यावर घंटागाडी कामगारांनी शनिवारी सकाळी सात वाजल्यापासून कचरा उचलण्यास सुरुवात केली. ‘आयुक्तांना ही बाब समजताच त्यांनी मला आणि समीक्षा कन्स्ट्रक्शनचे व्यवस्थापक मोहन गुर्रम यांना बोलावून काम बंद करण्याचे तोंडी आदेश दिले. आयुक्तांच्या तोंडी आदेशामुळेच काम बंद केले आहे’, अशी लेखी तक्रार कंत्राटदार राठोड यांनी आयुक्तांकडे पत्र देऊन शुक्रवारी केली आहे. आयुक्तांनी सांगितल्यामुळे सिडकोच्या तळोजा येथील डम्पिंग ग्राऊंडवर समीक्षा कंस्ट्रक्शनच्या गाड्या रिकाम्या करू दिल्या जात नसल्याचेही पत्रात म्हटले आहे. कंत्राटदाराने आयुक्तांच्या विरोधात दिल्या गेलेल्या पत्रामुळे कचऱ्याचा प्रश्न चिघळल्याचे दिसत आहे.

कामगारांचा पगार न झाल्यामुळे कामगारांनी बुधवार आणि गुरुवारी काम बंद केले. मी विनंती केल्यानंतर कामगारांनी पुन्हा शुक्रवारपासून कचरा उचलण्यास सुरुवात केली. मात्र आयुक्तांनी तोंडी आदेश दिल्यामुळे काम बंद केले. तळोजा डम्पिंग ग्राऊंडमध्ये घंटागाड्या रिकाम्या करू दिल्या नाहीत, म्हणून आम्हाला काम बंद करावे लागले. या प्रकाराची माहिती मी आयुक्तांना लेखी कळवली आहे.

- कंत्राटदार रवींद्र राठोड, समीक्षा कंस्ट्रक्शन

महासभेच्या आदेशाप्रमाणे प्रशासन कारवाई करीत आहे, अत्यावश्यक सेवा म्हणून आम्ही पगारासाठी कंत्राटदाराला पैसेही दिले होते. तरीदेखील कंत्राटदाराने दोन दिवस कचरा उचलण्याचे काम बंद करून नागरिकांना वेठीस धरले, पुन्हा १५ लाख रुपये दिले मात्र तरीही काम बंद ठेवल्यामुळे आम्ही पैसे देण्याचे थांबविले. आम्ही महापालिकेचा कारभार पारदर्शकपणे करीत आहोत.

- डॉ. सुधाकर शिंदे, आयुक्त