स्टेशन परिसरातच जुगाराचे अड्डे

म. टा. वृत्तसेवा, अंबरनाथ

शहरातील पश्चिम भागातील स्टेशन परिसरातील वर्दळ दिवसेंदिवस वाढत असून, याच वर्दळीच्या भागातील रिक्षास्टॅण्डसमोर असलेल्या बसडेपोच्या परिसरातच जुगाराचे अड्डे मांडले जात आहेत. यामुळे येथून रिक्षा पडकणाऱ्या प्रवाशांना गुंडप्रवृत्तीच्या टोळक्यांमुळे त्रास सहन करावा लागत आहे. मात्र हाकेच्या अंतरावरील पोलिस चौकीचे या जुगाराच्या अड्ड्यांकडे दुर्लक्ष होत असल्याने सर्वसामान्यांकडून संताप व्यक्त होत आहे.

अंबरनाथ शहरातील पश्चिम भागातील स्टेशन परिसरात बजबजपुरीचे वातावरण आहे. फेरीवाले, अरेरावी करणारे आणि बेशिस्तपणे उभ्या केलेल्या रिक्षा यामुळे आधीच सर्वसामान्यांच्या त्रासात भर पडली आहे. त्यात स्टेशन परिसरात असलेल्या दोन महत्त्वाच्या वर्दळीच्या ठिकाणी जुगारांचे अड्डे उघडपणे सुरू आहेत. स्टेशन परिसरातील बसडेपोच्या रस्त्यावर ‘काला पिला’ हा जुगार लावून येथून ये-जा करणाऱ्या सर्वसामान्यांना आकर्षित केले जाते. तसेच, स्टेशन परिसरातील पालिकेच्या पार्किंगच्या मागील बाजूसही मटक्याचे अड्डे असून या भागात एकाच रांगेत अंमली पदार्थांचे सेवन करणाऱ्या गर्दुल्ल्यांचा मोठा वावर आहे. अनेक जण येथे जुगार खेळण्यास येत असतात. यामुळे या रस्त्यावरून जाताना शाळकरी आणि कॉलेजचे विद्यार्थीही आकर्षित होत असतात. त्यामुळे शहराच्या स्टेशन परिसरातच रस्त्यावर उघडपणे जुगाराचे अड्डे सुरू होत असतील तर शहरातील कायदा-सुव्यवस्थेविषयी प्रश्नचिन्ह निर्माण झाले आहे.

या जुगाराच्या अड्ड्यांमुळे स्टेशन परिसरात गुंडांचा वावर वाढत आहे. त्यामुळेच स्टेशन परिसरात महिलांच्या गळ्यातील सोने लुटण्याचे प्रकार वाढत आहेत. मात्र पेट्रोलिंग करणाऱ्या पोलिसांचे संबंध असल्यानेच यांच्यावर कुठलीही कारवाई करण्यात येत नसल्याचा आरोप स्थानिक करत आहेत. तर, ज्या परिसरात हे जुगाराचे अड्डे सुरू असतात, त्याच परिसरात हाकेच्या अंतरावर पोलिस चौकी असून पोलिस याकडे दुर्लक्ष करत असतात. त्यामुळे येथून रिक्षा पकडणाऱ्या महिला तसेच तरुणींना या जुगाराच्या अड्ड्यांमुळे अधिक अडचणीला सामोरे जावे लागत असून पोलिसांनी याविरोधात कारवाई करण्याची मागणी केली जात आहे.