म. टा. वृत्तसेवा, कल्याण राज्य सरकारच्या नियमानुसार पालिकेच्या अधिकारी, कर्मचाऱ्यांना सातवा वेतन आयोग लागू करण्याच्या मागणीसह इतर मागण्यांसाठी मंगळवारी कामगार संघटनेकडून द्वारसभा घेण्यात आली. मात्र आयुक्त पाऊस दौऱ्यावर असल्यामुळे कामगारांच्या शिष्टमंडळाने उपायुक्त खोडके यांची भेट घेत त्यांना निवेदन दिले. यावेळी खोडके यांनी पालिका आयुक्त शिष्टमंडळाची पुढील आठ दिवसांत बैठक घेत कामगारांच्या प्रश्नाबाबत निर्णय घेणार असल्याचे सांगितले. म्युनिसिपल कर्मचारी कामगार सेना, अखिल भारतीय सफाई मजदूर काँग्रेस या कामगार संघटनांच्या द्वारसभेचे पालिका मुख्यालयाच्या प्रवेशद्वारावर आयोजन करण्यात आले होते. या सभेत म्युनिसिपल कर्मचारी कामगार सेना उपाध्यक्ष रवी पाटील, प्रकाश पेणकर यांच्यासह अखिल भारतीय सफाई मजदूर काँग्रेसचे अध्यक्ष चरणसिंह टाक उपस्थित होते. यावेळी रवि पाटील यांनी सरकारकडून आलेल्या अधिकाऱ्यांना सातवा वेतन आयोगानुसार पगार दिला जातो, मात्र पालिकेच्या कर्मचाऱ्यांना अद्याप हा आयोग लागू करण्यात आलेला नाही, हा अन्याय आहे. यामुळे कर्मचाऱ्यांना तातडीने सातवा वेतन आयोग लागू करत जानेवारी २०१६पासून फरकाची रक्कम रोखीने द्या, अशी मागणी केली. सेवाभरती व शर्ती नियमात केलेल्या बदलाबाबतचा प्रस्ताव सरकार मान्यतेसाठी पाठवला आहे. मात्र प्रस्तावाला मंजुरी मिळालेली नाही. पालिकेने सरकारकडून हा प्रस्ताव मंजूर करून घ्यावा, आकृतीबंध तयार करून सरकार मान्यतेसाठी पाठवावा, दिवाळीसाठी २५ हजार सानुग्रह अनुदान द्यावे, विधानसभा निवडणूक कार्यक्रम जाहीर होणार असल्याने विधानसभा निवडणूक आचारसंहिता लागू होण्याआधी सानुग्रह अनुदानाबाबत निर्णय घ्यावा, अशा मागण्या केल्या.
विविध मागण्यांसाठी द्वारसभा
म टा...
महाराष्ट्र टाइम्स.कॉम 3 Jul 2019, 4:00 am