म. टा. वृत्तसेवा, ठाणे
घरात झोपलेल्या अल्पवयीन मुलीला उचलून नेत मुलीवर बलात्कार केल्याची घटना शिळ-डायघर पोलिस ठाण्याच्या हद्दीत घडली आहे. याप्रकरणी गुन्हा दाखल करण्यात आला आहे. महादू जानू वाघ (५२ भोलेनाथनगर, शिळ रोड, मुंब्रा) असे या आरोपीचे नाव असून पोलिसांनी त्याला अटक केली आहे. पीडित मुलगी ११ वर्षांची आहे.
शनिवारी मध्यरात्री ही मुलगी घरात झोपली होती. आरोपीने तिच्या घराची कडी काढत मुलीचे तोंड कपड्याने दाबले. आणि तिला खांद्यावर उचलून बाजूच्या डोंगरावर घेऊन गेला. तेथे मारहाण करत मुलीवर बलात्कार केला. हा संपूर्ण प्रकार रात्री दीड ते पहाटे ६.३० दरम्यान घडला आहे. दुपारी तक्रार दाखल झाल्यानतर पोलिसांनी आरोपीला तात्काळ अटक केली. न्यायालयाने आरोपीला न्यायालयीन कोठडी दिली असल्याची माहिती डायघर पोलिसांनी दिली. या घटनेने परिसरात खळबळ उडाली आहे.