वसईतील पूरग्रस्तांना करमाफी द्या: भाजप

म. टा. वृत्तसवा, वसई

वसई-विरार-नालासोपारा शहरात जुलै २०१८मध्ये आलेल्या पुराचा फटका बसलेल्या पूरग्रस्तांना महापालिकेने मालमत्ता करातून सूट देऊन दिलासा द्यावा, अशी मागणी वसई विरार भाजपने केली आहे. महापालिका आयुक्त व महापौरांना याबाबत निवेदन देण्यात आले आहे.

या मोसमात जुलै महिन्यात ८, ९ व १० तारखेला तीन दिवस झालेल्या मुसळधार पावसामुळे वसई विरार महानगर क्षेत्रामध्ये अभूतपूर्व अशी पूरसदृश परिस्थिती निर्माण झाली होती. जवळपास तीन दिवस वसईचा बहुतेक भाग पाण्याखाली होता. हजारो घरे तसेच दुकाने-आस्थापनांमध्ये पाणी साचून सामान्य जनता व व्यापारी वर्गाचे कोट्यवधी रुपयांचे नुकसान झाले आहे. या संकटामुळे लोकांनी मोठ्या कष्टाने उभे केलेले संसार तसेच उद्योग पाण्याखाली गेले.

या पुरानंतर राज्य सरकार व पालघर जिल्ह्याच्या पालकमंत्र्यांच्या निर्देशाने महसूल विभागाने वसई तालुक्यात जवळपास ११ हजार ७०० घरे व दुकानांच्या नुकसानीचे पंचनामे करून पूरग्रस्तांना जवळपास ३ कोटी ५० लाखांहून जास्त मदत देण्यात आली. यामुळे काहीसा दिलासा मिळाला असला, तरी बाधितांचे झालेले नुकसान पाहता राज्य सरकारने नियमानुसार दिलेली मदत अपुरी ठरत आहे. तसेच व्यापारी वर्गालाही या मदतीचा लाभ मिळू शकला नाही. महापालिकेकडे नागरिक कर भरत असल्याने पालिकेच्या वतीने बाधितांना दिलासा मिळणे गरजेचे आहे. त्यामुळे महापालिकेने पुरामुळे बाधित झालेली घरे आणि आस्थापने यांना सन २०१८-१९चा मालमत्ता कर माफ करून दिलासा द्यावा, अशी विनंती भाजपतर्फे करण्यात आली आहे. भाजपाचे वसई-विरार शहर जिल्हा उपाध्यक्ष मनोज पाटील यांनी आयुक्त व महापौर यांना याबाबत लेखी निवेदन दिले आहे. लवकरच महापालिका याबाबत सकारात्मक निर्णय घेईल, अशा विश्वास भाजपला वाटत आहे.

वसई विरार भाजपची मागणी

० जुलैमधील पुरामुळे घरे, उद्योगांचे नुकसान

० सरकारी नियमानुसार मिळालेली मदत अपुरी