म. टा. प्रतिनिधी, ठाणे
इस्रायलची निर्मिती, राजकारणाचे धगधगते वास्तव आणि त्याचे शिल्पकार असलेल्या माजी पंतप्रधान गोल्डा मेयर यांचा प्रवास साहित्यरूपात वाचकांपर्यंत पोहोचला. जागतिक ग्रंथदिनाचे औचित्य साधून मराठी ग्रंथसंग्रहालय आणि इंडस सोर्स बुक्स यांच्यातर्फे वीणा गवाणकर लिखित 'गोल्डा : एक अशांत वादळ' या चरित्रग्रंथाचे प्रकाशन मंगळवारी करण्यात आले.
राजकारण, समाजकारण अशा विविध विषयांचे पैलू उलगडणारी चित्तथरारक कथा या पुस्तकाच्या प्रकाशनवेळी इस्रायलचे भारतातील वाणिज्य दूतावासातील उप-मुख्याधिकारी निमरोद कलमार, संस्थेचे अध्यक्ष प्रा. विद्याधर वालावलकर, कार्याध्यक्ष विद्याधर ठाणेकर उपस्थित होते. यावेळी लेखिका वीणा गवाणकर म्हणाल्या, गोल्डा मेयर यांचा एक स्त्री म्हणून आपण विचार करावा, असे मला वाटले. त्यांचा संघर्ष, कणखरपणा भावला होता. ज्यू निर्वासित, अरब निर्वासित यासाठी त्यांनी केलेले कार्य खूप मोठे आहे. वयाच्या ७५व्या वर्षी त्या पंतप्रधान झाल्या व खूप मोठे काम त्यांनी केले. त्यांचाच आदर्श डोळ्यासमोर ठेवून त्यांनी पुस्तक लेखनाचे काम हाती घेत पूर्ण केल्याचेही त्यांनी सांगितले. इस्रायलचे भारतातील वाणिज्य दूतावासातील उपमुख्याधिकारी निमरोद कलमार म्हणाले, गोल्डा मेयर यांना भारत व इस्रायल यांच्या भविष्यातील चांगल्या संबंधांबाबत आधीच कल्पना होती, त्यांना भविष्यकाळाचा चांगला अंदाज होता. १९७१मध्ये भारत-पाक युद्धात त्यांनी भारताला पाठिंबा दिल्याच्याही स्मृतींना त्यांनी उजळा दिला. महाराष्ट्रातील ज्यू समाजाने मराठी साहित्यात बरेच योगदान दिले असल्याचे ग्रंथसंग्रहालयाचे अध्यक्ष विद्याधर वालावलकर यांनी सांगितले. कार्यक्रमाचे निवेदन प्रा. प्रतीक्षा बोर्डे यांनी केले.
वाचककट्टा
ग्रंथदिनाच्या मुहूर्तावर वाचनकट्टा असा अभिनव कार्यक्रम दर महिन्याला करणार असल्याची माहिती देण्यात आली. ग्रंथ, लेखक आणि वाचक यांना एकत्र आणणारा हा कार्यक्रम असेल, असे कार्यवाह विद्याधर ठाणेकर यांनी सांगितले.