स्वसुरक्षा विषयावरील कार्यशाळेला उत्स्फूर्त प्रत‌सिाद

म. टा. वृत्तसेवा, वसई
वसईतील संत गोन्सालो गार्सिया महाविद्यालय आणि मुंबई विद्यापीठाचा विद्यार्थी विकास विभागाच्या वतीने पालघर जिल्हा परिक्षेत्रातील महाविद्यालयाच्या विद्यार्थीनींसाठी ‘स्वसुरक्षा’ म्हणजे सेल्फ डिफेन्स या विषयावर एक दिवसीय कार्यशाळा आयोजित करण्यात आली होती. बोर्डी, चिंचणी, पालघर, वसईतील विद्यार्थिनी कार्यशाळेत सहभागी झाल्या होत्या. पहिल्यांदाच अशाप्रकारे महाविद्यालयीन विद्यार्थिनींसाठी घेण्यात आलेल्या कार्यशाळेला चांगला प्रतिसाद मिळाला. विद्यार्थिनींनी स्वसंरक्षणासाटी सज्ज राहवे, असे आवाहन मान्यवरांनी केले.

या कार्यशाळेचे उद्घाटन एपीआय राणी पुरी यांच्या हस्ते झाले. घराबाहेर आणि घरातही आपले स्वत:चे संरक्षण करण्यास आपण समर्थ असले पाहिजे. आपले वीक-पॉइंट्स कोणाला कळू देऊ नयेत. त्याचाच गैरफायदा घेतला जातो. एखादी विपरीत घटना घडली तर ती आपल्या घरातील/जवळच्या माणसांना सांगायला हवी. त्याविरोधात आवाज उठवता आला पाहिजे. कोणत्याही क्षणी आत्मविश्वासाने वागायला हवे, घाबरून जाता कामा नये. आपल्या संमतीविरूध्द एखादा प्रसंग घडत असेल तर तेव्हा ‘नाही’, असे म्हणता आले पाहिजे, असे त्यांनी सांगितले.

नगरसेविका प्राची कोलासो आणि अॅड. साधना धुरी यांनी देखील प्रत्यक्ष उदाहरणे देत विद्यार्थिनींचे प्रबोधन केले. आत्मविश्वास असेल आणि योग्य वेळी ‘नाही’ म्हणता आले तर अत्याचार करण्यास कोणी धजावणार नाही, असे त्यांनी सांगितले. कराटे प्रशिक्षक सूर्यप्रकाश मुंडापाट यांनी स्व-संरक्षणासंदर्भात कराटे विद्येची प्रात्येक्षिक दाखवित तीन तास विद्यार्थिनींना मार्गदर्शन केले.

एसएनडीटी महाविद्यालयाच्या प्राध्यापक डॉ. विभूती पटेल यांनी महिलांसाठी घटनेने दिलेले अधिकार अत्यंत सोप्या शद्बांत विद्यार्थिनींसमोर मांडले. कायद्यातील तरतूदी, समान संधी नोकरीच्या ठिकाणी होणारा लैंगिक छळ, शोषण अशा अनेक बाबतीत आणि प्रत्यक्षात घडणाऱ्या घटनांचा आढावा त्यांनी घेतला.