कसारा: मध्य रेल्वेची वाहतूक हळूहळू पूर्वपदावर

मटा ऑनलाइन वृत्त। ठाणे

मध्य रेल्वेच्या कसारा रेल्वे स्थानकाजवळ यार्डकडे येत असताना मालगाडीचे डबे घसरल्याने ईगतपुरीच्या दिशेने जाणारी विस्कळीत झालेली रेल्वे वाहतूक हळूहळू पूर्वपदावर आली आहे. ऐन गर्दीच्यावेळी हा अपघात घडल्याने मध्य रेल्वेच्या वाहतुकीचा खोळंबा झाला होता. या अपघातानंतर मालगाडीचे डबे रुळावरून हटवण्याचे काम तातडीने सुरू करण्यात आले. हा अपघात सुमारे ७.३० च्या सुमाराला घडला. त्यानंतर मध्य रेल्वेची वाहतूक आसनगावपर्यंतच सुरू ठेवण्यात आली होती.

मालगाडीचे घरसलेले डबे काढण्याचे काम सुरू झाल्यानंतर काही वेळाने सीएसटीएम आणि ईगतपुरीच्या दिशेने जाणारी वाहतूक सुरू करण्यात आली. मात्र कसारा स्थानकातील प्लॅटफॉर्म क्रमांक १ बंदच ठेवण्यात आला होता. काही वेळाने तोही सुरू करण्यात आला.



लांब पल्ल्याच्या गाड्यांचा खोळंबा

कसारा स्थानकाजवळ मालगाडीचे दोन डबे घसरल्याने लांब पल्ल्यांच्या गाड्याच्या वाहतुकीवर मोठा परिणाम झाला. या अपघातामुळे राज्यराणी एक्सप्रेस, विदर्भ एक्सप्रेस, पंजाब मेल आणि अमरावती सुपरफास्ट एक्सप्रेस या लांबपल्ल्याच्या गाड्या खोळंबल्या.