राजनाथ सिंह यांच्या सभेत तडीपार गुंडाची हजेरी

पालघर:

महायुतीचे पालघरमधील उमेदवार राजेंद्र गावित यांच्या प्रचार सभेत तडीपार केलेल्या गुंडाने हजेरी लावली. विशेष म्हणजे या सभेला केंद्रीय गृहमंत्री राजनाथ सिंह यांनी संबोधित केले. त्यामुळे गृहमंत्र्याच्या सभेत तडीपार गुंड उपस्थित राहिल्यामुळे अनेकांच्या भुवया उंचावल्या आहेत.

केंद्रीय गृहमंत्री राजनाथ सिंह यांनी नालासोपारा आणि मीरा रोड येथे सभा घेतल्या. नालासोपारा येथील सभेत पोलिसांचा कडेकोट बंदोबस्त होता. गृहमंत्र्यांची सभा असल्यामुळे अनेक वरिष्ठ पोलीस अधिकारीदेखील सभास्थळी हजर होते. मात्र, तरीही तडीपार केलेला संजय बिहारी हा गुंड सभेला हजर राहिल्याने आश्चर्य व्यक्त करण्यात येत आहे. संजय बिहारी भाजपचे मफलर आणि टोपी घालून सभास्थळी उपस्थित होता.

दरम्यान, केंद्रीय मंत्री राजनाथ सिंह यांनी प्रचार सभेत सर्जिकल स्ट्राइक, सरकारने राबवलेल्या विकास योजना यावर मांडणी करत महायुतीच्या उमेदवारांना विजयी करण्याचे आवाहन केले.