गर्भवती महिलेला लोकलमध्ये मारहाण

मटा ऑनलाइन वृत्त । ठाणे

लोकलमधील अपंगांसाठी राखीव असलेल्या डब्यातून प्रवास करणाऱ्या गर्भवती महिलेला दोन धडधाकट पुरूषांनी लाथाबुक्क्यांनी बेदम मारहाण केल्याची धक्कादायक आणि माणूसकीला काळीमा फासणारी घटना घडली आहे. हा प्रकार पाहून संतप्त प्रवाश्यांनी त्यांच्या दिशेने मोर्चा वळवताच या दोघांनी स्टेशन येताच चालत्या ट्रेनमधून उड्या मारून पळ काढला. याप्रकरणी रेल्वे पोलिसांनी गुन्हा नोंदविला असून या फरार आरोपींचा शोध घेत आहे.

कुर्ला आणि घाटकोपर दरम्यान हा प्रकार घडला. विठ्ठलवाडीला राहणारे दिनेश तिवारी हे शनिवारी त्यांच्या पत्नीला घेऊन मुंबईच्या कामा रूग्णालयात गेले होते. त्यांची पत्नी अरूणा या ८ महिन्याच्या गर्भवती असल्याने त्यांच्यावर कामा रूग्णालयात तीन दिवस उपचार सुरू होते. मंगळवारी अरूणा यांना रूग्णालायतून डिस्चार्ज मिळाला. त्यामुळे त्यांनी मंगळवारी सायंकाळी ७ वाजता सीएसटीवरून विठ्ठलवाडीला जाणारी जलद लोकल पकडली. लोकलला गर्दी असल्याने हे दोघेही अपंगांसाठी राखीव असलेल्या डब्यात बसले. कुर्ला स्थानकात ट्रेन येताच दोन धडधाकट पुरूषांनी अपंगाच्या डब्यात प्रवेश केला. या दोघांनी हा अपंगांचा डबा आहे. तुम्ही या डब्यात कसे? अशी विचारणा दिनेश आणि त्याच्या पत्नीला केली. त्यावर पत्नी गर्भवती असून लोकलला गर्दी असल्याने आम्ही या डब्यात शिरलो. विठ्ठलवाडी स्टेशन आले की उतरून जातो, असं दिनेशनं सांगितलं. त्यामुळे भडकलेल्या या दोघांनी संतापाच्या भरात दिनेशला शिवीगाळ करत त्यांना मारहाण करायला सुरूवात केली. दिनेशला सोडवण्यासाठी अरुणा मधे पडताच या दोघांनी अरूणाला आधी चापटीने आणि नंतर लाथाबुक्क्यांनी मारहाण केली. हा प्रकार पाहून संतापलेल्या प्रवाशांनी या दोघांची धुलाई करायला सुरूवात केली. त्यामुळे या दोघांनी डोंबिवली स्टेशन येताच लोकलमधून उड्या मारून पळ काढला.

या दांपत्यांनीही डोंबिवलीला उतरून पोलिसांत तक्रार नोंदविली. दरम्यान, हा प्रकार कुर्ला येथे झाल्याने कुर्ला जीआरपी याप्रकरणाचा तपास करणार असल्याचं डोंबिवली रेल्वे पोलीस स्टेशनचे वरिष्ठ निरीक्षक जी. हिरेमठ यांनी सांगितलं.