एमआयडीसीला हायटेक सुरक्षेचे कवच

मिलापनगरमध्ये वायरलेस सुरक्षा यंत्रणेचा प्रथमच वापर

म. टा. वृत्तसेवा, डोंबिवली

नियमित होणाऱ्या घरफोड्या, सराईत झालेले चोर, यावर आळा घालण्यासाठी एमआयडीसी भागामध्ये प्रथमच हायटेक तंत्रज्ञानाचा वापर करण्यात येणार आहे. मिलापनगरमध्ये वायरलेस सुरक्षा तंत्रज्ञानाचा वापर केला जाणार आहे. सध्या ३० जणांनी या यंत्रणेसाठी नोंदणी केली असून आणखी रहिवासी याचा वापर करण्याची शक्यता आहे.

होम इलेक्ट्रिकल्स या वायरलेस यंत्रणेची निर्मिती करणाऱ्या संस्थेशी संपर्क साधून एमआयडीसीमध्ये वायरलेस सुरक्षा कार्यान्वित करण्यात येणार आहे. अद्ययावत बझर सिस्टीम, त्याचबरोबर सुरक्षा जॅमर आणि फोन अॅलर्ट यांसारख्या फीचर्सचा यामध्ये समावेश आहे. अंधाराचा फायदा घेऊन आवाज न करता चोर चोरी करतात. हे प्रकार रोखण्यासाठी बझरचा वापर करण्यात येणार आहे. या यंत्रणेमुळे चोराने रात्रीच्या वेळी घरात खिडकीवाटे शिरण्याचा प्रयत्न केला तर ११० डेसिबलचा आवाज होऊन अलार्म वाजणार आहे. त्याचबरोबर अलार्म वाजताच आजूबाजूच्या ६ जणांच्या घरी फोन जाऊन आपोआप चोर घरात शिरल्याची माहिती मिळणार आहे. तसेच काही जणांना एसएमएसद्वारे या चोरीच्या प्रयत्नांची माहिती मिळणार आहे.

सीसीटीव्ही यंत्रणा निष्क्रिय करून चोरी करताना हल्ली चोर दिसत असल्यामुळे या नवीन व्यवस्थेच्या यंत्रामध्ये लोखंडाचा वापर केलेला आहे. हे यंत्र घरात लावलेले असेल. चोरांना हे यंत्र फोडता येणार नाही, अशीही व्यवस्था करण्यात आली आहे. त्यामुळे सुरक्षेची पूर्णपणे काळजी या यंत्रणेमध्ये घेण्यात आली आहे. घरातून बाहेर पडण्याचे मार्ग त्याचबरोबर सर्व खिडक्या, दरवाजे यांवर सेन्सर बसवण्यात येणार आहेत. त्याचबरोबर मनुष्य पडताळणी यंत्रणासुद्धा यामध्ये असणार आहे. त्यामुळे रहिवाशांना याचा फायदा होईल.

एमआयडीसीमध्ये मिलापनगर रेसिडेन्ट वेल्फेअर असोसिएशनने यासाठी पुढाकार घेतला होता. यासाठी स्थानिकांची बैठक घेऊन त्यांना या यंत्रणेची माहिती देण्यात आली आणि त्याचे फायदे समजवण्यात आले होते.