घरातील पाच जणांची मतदानासाठी वणवण
म. टा. प्रतिनिधी, ठाणे
एकाच घरात राहणाऱ्या मतदारांची नावे पाच वेगवेगळ्या ठिकाणी आल्यामुळे मतदारांना धावाधाव करावी लागल्याचा अजब प्रकार उघडकीस आला. ठाण्यातील उपवन येथील गुलमोहर सोसायटी राहणाऱ्या म्हात्रे कुटुंबीयांमधील अश्विनी म्हात्रे यांचे नाव मिरा रोड येथील मतदानकेंद्रावर आले असून उर्वरित चौघांनाही शहरातील वेगवेगळ्या मतदानकेंद्रांवर पोहोचविण्यासाठी दिवसभर वणवण करावी लागली.
लोकशाहीच्या उत्सवात सहभागी होण्यासाठी घराघरात मतदार उत्सुक असले तरी म्हात्रे कुटुंबीयांची मात्र दोन दिवसांपासून केंद्राची शोधाशोध सुरू होती. मतदानापूर्वी येणाऱ्या स्लिप न आल्याने कुटुंबप्रमुख राजेंद्र म्हात्रे यांनी ऑनलाइन पद्धतीने शोध घेतला असता घरातील पाचही व्यक्तींचे नाव वेगवेगळ्या केंद्रात असल्याचे पाहताच त्यांना धक्का बसला. अश्विनी आणि श्रेया या त्यांच्या मुली नवमतदार असून मतदानासाठी उत्सुक होत्या. मात्र त्यापैकी अश्विनी हिचे मतदान थेट मिरा रोड येथील मतदानकेंद्रावर असल्याचे कळताच त्यांचे धाबे दणाणले. राजेंद्र यांचे एकट्याचेच मतदान घरापासून नजिकच्या केंद्रावर होते. मात्र त्यांचे ९२ वर्षीय सासरे यशवंत म्हात्रे यांनाही घरापासून तब्बल सव्वा किलोमीटर अंतरावर असलेल्या महापालिका शाळा क्रमांक ४८ केंद्र गाठावे लागले. वयोवृद्ध सासऱ्यांना केंद्रापर्यंत नेतानाच तारेवरची कसरत करावी लागली. मात्र केंद्रावरील डोलीच्या आधारे पहिल्या मजल्यावर जात त्यांनी मतदानाचा हक्क बजाविल्याचे राजेंद्र यांनी सांगितले. राजेंद्र यांची कन्या श्रेया हिचे मतदान वसंतविहार या भागात आले होते. तर त्यांच्या पत्नीला गांधी नगरच्या शेलारवाडी केंद्र गाठावे लागले. हे केंद्र घरापासून तब्बल सव्वातीन किलोमोटर लांब असल्याचेही त्यांनी सांगितले. मतदानासाठी सुट्टी असली तरी कुटुंबातील प्रत्येक मतदाराला केंद्र शोधण्यासाठी सहकार्य करण्याची जबाबदारी राजेंद्र यांच्यावर असल्याने संपूर्ण दिवसभर याच प्रक्रियेत घालवावा लागल्याची खंत त्यांनी व्यक्त केली. त्यातही मुलीला मिरा रोड गाठणे शक्य नसल्याने इच्छा असूनही तिची मतदानाची संधी हुकल्याचेही त्यांनी सांगितले.
……
ऑनलाइन शोध
मतदानापूर्वी घरी येणाऱ्या स्लिपमुळे केंद्राची माहिती मिळत होती. मात्र यंदा या स्लिप न आल्याने अनेक कुटुंबीयांप्रमाणे म्हात्रे कुटुंबालाही ऑनलाइन पद्धतीने ही शोधाशोध करावी लागली. यंत्रणेतील त्रुटींचा फटका म्हात्रे कुटुंबालाही बसला.
एकाच घरात राहणाऱ्या मतदारांची नावे पाच वेगळ्या केंद्रावर आली, ही बाब गंभीर आहे. प्रत्येकाला मतदान करण्याची इच्छा असल्याने त्यांना केंद्रापर्यंत पोहोचविण्यात संपूर्ण दिवस घालवावा लागला. त्यातच मिरा रोड केंद्र गाठणेही शक्य झाले नाही.
राजेंद्र म्हात्रे