म. टा. वृत्तसेवा, पालघर
पालघर जिल्हा परिषद, जव्हार तालुक्यातील सारसून येथील शाळेतील शिक्षक रोहित जाधव यांचा नवी दिल्ली येथे भारत सरकारच्या सांस्कृतिक स्रोत, प्रशिक्षण केंद्राचे संचालक ऋषी कुमार वशिष्ठ यांच्या हस्ते सन्मान करण्यात आला.
पालघर जिल्ह्यातील जव्हार तालुक्यातील सारसून जिल्हा परिषद शाळेतील कार्यरत असलेले शिक्षक रोहित प्रल्हादराव जाधव यांचा भारत सरकारच्या सीसीआरटीच्या वतीने नवी दिल्ली येथे 'देश पातळीवरील शिक्षणात हस्तकौशल्याचा समावेश', हे प्रशिक्षण पूर्ण केल्याबद्दल सीसीआरटीचे संचालक ऋषी कुमार वशिष्ठजी यांनी विशेष प्रमाणपत्र देऊन गौरव केला. संपूर्ण देशातून नवी दिल्ली सीसीआरटीने प्रशिक्षणासाठी ५१ शिक्षकांची निवड केली. कोकण विभागातून एकमेव रोहित जाधव यांची निवड करण्यात आली. हे प्रशिक्षण नवी दिल्ली येथे होते. या प्रशिक्षणास महाराष्ट्र, गुजरात, उत्तर प्रदेश, मिझोराम, अरुणाचल प्रदेश, कर्नाटक, तामिळनाडू, या राज्यातील शिक्षक उपस्थित होते.
रोहित जाधव यांनी सीसीआरटी येथे वारली चित्रकलेचा इतिहास व शिक्षणात वारली चित्रकलेसारखे अन्य हस्तकला यांचे महत्त्व यावर सादरीकरण केले. त्याबद्दल सीसीआरटीचे संचालक वशिष्ठ जी यांच्या हस्ते प्रमाणपत्र देऊन गौरविण्यात आले. रोहित जाधव यांना सीसीआरटी प्रशिक्षणास जाण्यासाठी जव्हारमधील सर्व शिक्षक संघटनांची प्रेरणा व गटशिक्षणाधिकारी भरत कासले यांचे मार्गदर्शन मोलाचे ठरले.