पारंपरिक पद्धतीने आज देवीची स्थापना
दांडिया आणि महाभोंडल्यांचे आयोजन
टेंभीनाक्यावर पेशवाई महल; शिवाईनगरला शक्तिपीठांचे दर्शन
म. टा. प्रतिनिधी, ठाणे
अश्विन शुद्ध प्रतिपदेच्या अर्थात नवरात्रीच्या पहिल्या दिवसाची जय्यत तयारी जिल्ह्यात झाली असून ठाण्यातही उत्साहात देवीच्या मिरवणुका काढण्यासाठी मंडळे सज्ज झाली आहेत. ठाण्यातील टेंभीनाका परिसर नवरात्रोत्सवासाठी विशेष प्रसिद्ध असून तेथील जत्रा संपूर्ण ठाणेकरांच्या आकर्षणाचे केंद्रबिंदू असते. ठाणे शहरामध्ये टेंभीनाका, शिवाईनगर, रघुनाथनगर, ठाणे रेल्वे स्थानक परिसरामध्ये देवीची स्थापना होणार आहे. देवीसमोर गोंधळ, महाभोंडल्यासारखे कार्यक्रम होणार असले तरी शहरात दांडियांचेही आयोजन मोठ्या प्रमाणात होताना दिसत आहे. निवडणूक आचारसंहितेचा अडथळा असला तरी पारंपारिक पद्धतीने उत्सव साजरा करण्यासाठी ठाणेकर सज्ज झाले आहेत.
ठाण्यातील टेंभीनाका परिसरातील सावर्जनिक नवरात्रोत्सवातील देवी विशेष प्रसिद्ध असून मुंबई आणि आसपासच्या शहरातून अनेक भाविक या देवीच्या दर्शनासाठी दाखल होतात. येथील जत्रेचे आयोजन आणि देवीचा देखावाही विशेष असल्यामुळे ते पाहण्यासाठीही अनेक नागरिकांची झुंबड उडत असते. यंदा याठिकाणी पेशवेकालीन महाल उभारण्यात आला आहे. देवीचा आगमन सोहळा आणि मिरवणूक विशेष असणार आहे, असे आयोजकांच्या वतीने नरेश म्हस्के यांनी स्पष्ट केले.
नवरात्रोत्सवात प्रसिद्ध शक्तिपीठांच्या स्थळी प्रचंड गर्दी असते. त्यामुळे अनेक भाविकांची इच्छा असूनही खर्चाच्यामुळे दर्शनाला सगळीकडेच जाता येत नाही. शिवाईनगर सार्वजनिक नवरात्रोत्सव मंडळाने यंदा भाविकांची ही अडचण ओळखून महाराष्ट्रासह भारतातील प्रसिद्ध देवीच्या प्रतिकृतीचा देखावा उभारण्याचा मानस घेऊन तो प्रत्यक्षात आणला आहे. महाराष्ट्रातील कोल्हापूरची महालक्ष्मी माता, माहूरची रेणुका माता, तुळजापूरची भवानी माता, वणीची सप्तश्रुंगी माता ही साडेतीन शक्तीपीठ तसेच कार्ल्याची एकविरा देवी, गुजरातची चामुंडा माता, कोलकाताची कालीमाता आणि कटाराची वैष्णोदेवी माता यांचे दर्शन भाविकांना घेता येणार आहे, असे आयोजक सुधाकर चव्हाण यांनी सांगितले.
गरबा आणि दांडियांचे आयोजन…
ठाणे शहरामध्ये पारंपरिक गरबा आणि दांडियांचे आयोजन मोठ्या प्रमाणात होणार असून त्या दृष्टीनेही शहर सज्ज झाले आहे. मॉडेला परिसरामध्ये गेल्या काही वर्षांपासून महादांडियाचे आयोजन होते. तर वर्तकनगर परिसरातही सन्मान युवा प्रतिष्ठानचा दांडिया महोत्सव ठाणेकरांसाठी विशेष पर्वणी असतो. यंदाही पारंपरिक पद्धतीने या गरब्याचे आयोजन करण्यात आले असून काही ठिकाणी डीजेऐवजी ऑर्केस्ट्राला प्राधान्य देण्यात आले आहे.
विश्वास सामाजिक संस्थेचा महाभोंडला…
विश्वास सामाजिक संस्थेतर्फे नवरात्री निमित्ताने महाभोंडल्याचे आयोजन ठाण्यात करण्यात आले असून हे संस्थेचे १७वे वर्ष आहे. रविवार, ६ ऑक्टोबर रोजी सायंकाळी ५.३० वाजता हितवर्धिनी सभेच्या उमा नीळकंठ व्यायामशाळेच्या पटांगणामध्ये हा कार्यक्रम होणार आहे. सिने-तारका आणि सामाजिक कार्यकर्त्यांच्याची उपस्थिती लक्षवेधी ठरणार आहे.