अनैतिक संबंधातून केली पतीची हत्या

म. टा. प्रतिनिधी, ठाणे

अनैतिक संबंधात अडथळा ठरणाऱ्या पतीची हत्या करून त्यानंतर त्याचा मृतदेह दुचाकीवरून फरफटत रुग्णालयात आणून मित्रासह पळ काढणाऱ्या एका महिलेवर कासरावडवली पोलिस ठाण्यात हत्येचा गुन्हा दाखल झाला आहे. गोपी नाईक असे या महिलेचे नाव असून शनिवारी रात्री तिने आपल्या मित्राच्या साहाय्याने नवऱ्याची हत्या केल्याचे समोर आले आहे. पोलिसांनी सिव्हिल रुग्णालयातील सीसीटीव्ही कॅमेरे आणि घराच्या परिसरातील कॅमेरे तपासल्यानंतर ती आणि तिचा मित्र मृतदेहाची विल्हेवाट लावत असल्याचे दिसून आले आहे. याप्रकरणी पोलिस उपनिरीक्षक संतोष धावडे यांनी तक्रार दाखल केली आहे.

ठाण्यातील घोडबंदर रोडवरील गायमुख परिसरातील श्रमसाफल्य आवास योजनेतील घरामध्ये महापालिकेचा कर्मचारी असलेला गोपी नाईक राहत होता. त्याच्या पत्नीचे नेरळ येथील मित्र महेश कराळे याच्यासोबत अनैतिक संबंध होते. याच संबंधातून तिने पतीची हत्या केली. त्यानंतर त्याचा मृतदेह स्कुटीवर टाकून फरफटत घेऊन निघाले. त्यानंतर रिक्षातून सिव्हिल रुग्णालयात पोहचून त्यांनी तिचा नवऱ्याचा रस्त्यात अपघात झाल्याचे सांगत त्याला तिथे सोडण्यात आले. त्यानंतर मित्रासोबत तेथून फरार झाली. गोपी याच्या भावानेही पत्नी आणि मित्राला सीसीटीव्ही कॅमेऱ्यातील चित्रणावरून ओळखले आहे. गळा दाबून आणि डोक्यात प्रहार करून हत्या केल्याचे शवविच्छेदन अहवालातून समोर आले आहे. आरोपी प्रिया नाईक आणि महेश कराळे फरार झाले आहे, अशी माहिती कासारवडवली पोलिसांनी दिली.