म. टा. वृत्तसेवा, ठाणे
प्रियकराच्या मदतीने पतीची हत्या करून फरारी झालेल्या पत्नीसह तिच्या प्रियकराला कासारवडवली पोलिसांनी अवघ्या ७२ तासांत नेरळमधून अटक केली आहे. अनैतिक संबधातून हे हत्याकांड घडले असल्याची माहिती पोलिसांनी दिली. मृत व्यक्ती हा अपघातात जखमी झाल्याचा खोटा बनावही आरोपींनी केला होता. आरोपींना ठाणे न्यायालयाने सात दिवसांची पोलिस कोठडी दिली आहे.
गंभीर जखमी अवस्थेत गोपी नाईक (३० रा. गायमुख, घोडबंदर रोड) याला २९ डिसेंबरच्या पहाटे पत्नी प्रिया (२७) हिने अन्य एका व्यक्तीच्या मदतीने सिव्हिल रुग्णालयात उपचारासाठी दाखल केले होते. यावेळी गोपीचा अपघात झाल्याचे सांगितले होते. नंतर प्रिया आणि त्या व्यक्तीने रुग्णालयातून पळ काढला. परंतु रुग्णालयात दाखल होण्यापूर्वीच गोपीचा मृत्यू झाला होता. कासारवडवली पोलिसांना माहिती मिळाल्यानंतर त्यांनी चौकशी सुरू केली. चौकशीत गोपीची हत्या झाल्याची बाब पुढे आली. तसेच, प्रिया आणि तिच्यासोबची व्यक्ती फरार होती. वरिष्ठ पोलिस निरीक्षक दत्ता ढोले यांच्या मार्गदर्शनाखाली पोलिस निरीक्षक वैभव धुमाळ, नासीर कुलकर्णी, सहाय्यक पोलिस निरीक्षक कैलास टोकले, संदीप पाटील यांच्या पथकाने प्रिया आणि तिचा प्रियकर महेश कराळे (रा. कर्जत) या दोघांना नेरळमधून अटक केली.
महेश हा रेल्वेत खलाशी म्हणून काम करत असून फेसबुकवरून त्याची प्रियाशी ओळख झाली होती. अनैतिक संबंधातून प्रियाने प्रियकराची मदत घेत पतीची अत्यंत निर्घृणपणे हत्या केली असल्याची माहिती वरिष्ठ पोलिस निरीक्षक ढोले यांनी दिली. गोपीच्या जेवणात झोपेच्या गोळ्याही टाकल्या होत्या. हत्येनंतर दोघेही माथेरानला गेले होते, असेही ढोले म्हणाले.