म. टा. वृत्तसेवा, कल्याण
गुरुवार संध्याकाळपासून सुरू असलेल्या संततधार पावसाने कल्याण शहरात ठिकठिकाणी पाणी साचले असून शुक्रवार दुपारी चार वाजेपर्यंत सरासरी ९६ मिमि पावसाची नोंद झाली. महापालिका क्षेत्रात वेगवेगळ्या ठिकाणी १३ झाडे व एक इलेक्ट्रिक खांब कोलमडून पडल्याने काहीकाळ वाहतूक विस्कळीत झाली होती. धोकादायक असलेली कर्पेवाडी कल्याण पूर्व येथील तीन मजली नायर बिल्डिंगच्या जिन्याचा काही भाग पडला, मात्र कोणतीही हानी झाल्याची नोंद नाही. तर, 'क' प्रभाग क्षेत्रांतर्गत शिवाजी चौकात असलेली अतिधोकादायक जयहरी इमारत पोकलेन व जेसीबीच्या सहायाने क प्रभागक्षेत्र अधिकारी भारत पवार व त्यांच्या पथकाने निष्कासित केली. महापालिका क्षेत्रात अटाळी , चिकणघर, बेतुरकरपाडा, निक्की नगर, राम मंदिर, एव्हरेस्ट कॉलनी, सम्राट नगर, हिना कॉलनी या परिसरात पाणी साचल्याच्या तक्रारी प्राप्त झाल्यावर प्रभागक्षेत्र अधिकाऱ्यांनी कामगारांमार्फत साचलेल्या पाण्याची विल्हेवाट लावण्याची कारवाई केली . तर, डोंबिवली परिसरात तुकाराम नगर, ठाकुर्ली पूर्व येथे मोठ्या प्रमाणावर पाणी साचले होते.