माझी आई गेली हो! मुलानं शेजारच्यांना सांगण्यास सुरुवात केली; तपासात वेगळीच माहिती उघड झाली

कल्याण : अंबरनाथ, उल्हासनगर पाठोपाठ आता कल्याणमध्ये धक्कादायक घटना घडली आहे. कल्याण पूर्वेतील एका बेरोजगार मुलाने आईचा नायलॉनच्या दोरीने गळा आवळून घरात खून केला आहे. अंबरनाथमध्ये सुनेने सासूच्या बोटांचा चावा घेतला. उल्हासनगरात दारुड्या नवऱ्याने बायकोवर जीवघेणा हल्ला केल्याच्या घटना ताज्या असताना आता कल्याणमध्ये बेरोजगार मुलाने नायलॉनच्या दोरीने गळा आवळून आईचा घरात खून केला आहे.

कल्याण पूर्वेतील कोळसेवाडी भागातील हनुमान नगर भागात एका बेरोजगार मुलाने पैशाच्या कारणावरुन आपल्या आईचा नायलॉनच्या दोरीने गळा आवळून घरात खून केला. खून लपवण्यासाठी त्याने तिचा मृतदेह घराच्या छताला लटकवला आणि आत्महत्येचा बनाव रचला. या मुलाचा हा बनाव पोलिसांनी उघड करुन त्याला अटक केली. मंगळवारी रात्री हा प्रकार घडला आहे. सरोजा पुमणी असे मयत महिलेचे नाव आहे. तर रवी पुमणी (३४, रा. प्रभुकुंज सोसायटी, मनीषा गॅस एजन्सी गोदाम जवळ, हनुमान नगर, कल्याण पूर्व) असे आरोपी तरुणाचे नाव आहे.
दोन महिन्यांपूर्वी नोकरीला, ATM कॅश व्हॅन चालक पावणे ३ कोटींसह पळाला, लोकेशन कळलं, पण...
रवी पुमणी हा बेरोजगार आहे. त्याला नोकरी, व्यवसाय नसल्याने तो नियमित आईकडे पैशांची मागणी करायचा आणि ते पैसे बाहेर उधळायचा. सतत पैसे देणे शक्य नसल्याने आई सरोजा त्याला नकार देत होती. त्याचा राग रवीला येत होता. मंगळवारी रात्री दीड वाजता आई सरोजा, मुलगा रवी दोघे जण घरात होते. त्यांच्यात किरकोळ कारण आणि पैशांच्या विषयावरुन वाद झाला. सरोजाने त्याला पैसे देण्यास नकार दिला. त्यामुळे संतप्त झालेल्या रवीने आईशी भांडण उकरुन काढून तिला बेदम मारहाण केली.

रागाच्या भरात रवीने आईला जमिनीवर पाडून तिच्या गळ्याला नायलॉनच्या दोरीचा फास लावून तिला जागीच ठार मारले. आईचा खून केल्यानंतर हे प्रकरण आता आपल्या अंगलट या भीतीने रवीने आईने सरोजाने गळफास घेऊन आत्महत्या केली असा बनाव रचला होता. त्याने मृत पावलेल्या आईला दोरीच्या सहाय्याने घरातील पंख्याला लटकवले. शेजाऱ्यांना आपण घरात आपल्या खोलीत झोपलो असताना आपल्या नकळत आईने गळफास घेतला असल्याचे सांगण्यास सुरुवात केली.
अंधेरीत खून, मृतदेह बॅगेत टाकून लोकल प्रवास; नायगावात बॅग फेकली, वैष्णोदेवी गाठली अन् मग...
पोलिसांनी चौकशीत प्रकार उघड
दरम्यान याबाबतची कोळसेवाडी पोलिसांना या गुन्ह्याची माहिती मिळाली. पोलिसांनी रवीची पार्श्वभूमी तपासली आणि त्याची सखोल चौकशी केली. या चौकशीत त्याने आपण आईचा नायलॉनच्या दोरीने गळा आवळून खून केल्याची कबुली दिली. कोळसेवाडी पोलीस ठाण्याचे उपनिरीक्षक दिगंबर पवार यांच्या तक्रारीवरुन रवी पुमणी विरुद्ध खुनाचा गुन्हा दाखल करण्यात आला असून पुढील कारवाई सुरू केली आहे.