फायनान्स कंपनीच्या नावे दुचाकीचोरी

म. टा. वृत्तसेवा, अंबरनाथ

फायनान्स कंपनीचे कर्मचारी असल्याचे भासवत एका ज्येष्ठ नागरिकाची इमारतीच्या पार्किंगमध्ये उभी असणारी दुचाकी भुरट्यांनी चोरल्याची घटना उघडकीस आली आहे. या प्रकरणी पोलिस स्टेशनपासून सर्वत्र तक्रार करूनही न्याय मिळत नसल्याने या ज्येष्ठ नागरिकाची परवड सुरू आहे. मुख्यमंत्र्यांनी तरी न्याय देत या तक्रारीची दखल घ्यावी, अशी मागणी त्यांनी केली आहे.

अंबरनाथ येथील पूर्व भागातील एम. पी. गेट सरस्वती इमारतीत मालगुंडकर राहत असून, डिसेंबरमध्ये त्यांच्या इमारतीच्या पार्किंगमध्ये त्यांनी दुचाकी उभी केली होती. मात्र संध्याकाळी बजाज फायनान्सच्या नावे आलेल्या काही लोकांनी परस्पर ती दुचाकी उचलून नेत, त्या ठिकाणी ते एक पावती ठेवून गेले होते. या प्रकरणी मालगुंडकर यांनी पावतीवर दिलेल्या क्रमांवर संपर्क साधला असता, आमच्या एका व्यक्तीकडे ६० हजार रुपये आणि आरसी बुक जमा करण्यास त्यांनी सांगितले. या प्रकरणी मालगुंडकर शिवाजी नगर पोलिस ठाण्यात तक्रार दाखल करण्यास गेले असता, त्यांची तक्रार नोंदवण्यास पोलिसांनी नकार देत न्यायालयात जाण्याचा सल्ला दिला. या प्रकरणी त्यांनी गोरेगाव येथील बजाज फायनान्स कंपनीशी भेट घेतली असता, कंपनीची देणी पूर्ण झाली असल्याने आम्ही गाडी उचलली नसल्याचे स्पष्ट केले. तसेच, हे कर्मचारी आपले नसल्याचे सांगितले.

या प्रकरणी मालगुंडकरांनी वरिष्ठ पोलिस अधिकाऱ्यांपर्यंत पत्रव्यवहार करत न्याय मागितला आहे. मात्र त्यांच्या तक्रारीला अद्याप कुणीही दाद देत नसल्याने, या ज्येष्ठ नागरिकांची ससेहोलपट होत आहे. या प्रकरणी त्यांनी थेट मुख्यमंत्र्यांकडे पोलिसांच्या गैरवर्तनाबाबत तक्रार केली असून मला किमान मुख्यमंत्र्यांकडून तरी न्याय मिळेल, अशी अपेक्षा ते व्यक्त करत आहेत.