म. टा. प्रतिनिधी, ठाणे
गुन्ह्यातील जप्त नमुन्यांचे शास्त्रीय पद्धतीने आता ठाण्यातच परीक्षण होणार असून परीक्षणासाठी मुंबईतील प्रयोगशाळेत जाण्यासाठी पोलिसांना करावी लागणारी धावपळ थांबणार आहे. ठाण्यात आज, सोमवारी लघु न्यायसहायक वैज्ञानिक प्रयोगशाळेचे म्हणजेच फॉरेन्सिक लॅबचे उद्घाटन होणार असून या प्रयोगशाळेमुळे पोलिसांना नमुन्यांचे अहवाल लवकर मिळून ते न्यायालयात वैज्ञानिक पुरावा म्हणून सादर करता येतील.
दोषसिद्धीचे प्रमाण वाढवण्यासाठी वेगवेगळ्या उपायोजना करण्यात येत असून याचाच एक भाग म्हणून राज्यातील न्यायसहायक वैज्ञानिक प्रयोगशाळांच्या सक्षमीकरणावर सरकारने भर दिला आहे. याबाबत प्रधान (गृह विभाग) यांच्या अध्यक्षतेखाली १२ मे २०१५ रोजी एक समिती स्थापन करण्यात आली होती. समितीने काही शिफारशी केल्या होत्या. यामध्ये पाच नवीन प्रयोगशाळा निर्माण करून अद्ययावत यंत्रसामुग्री उपलब्ध करून देण्याची शिफारस केली होती. मुंबईतील न्यायसहायक वैज्ञानिक प्रयोगशाळा संचालनालयाच्या अधिपत्याखाली नागपूर, पुणे, औरंगाबाद, नाशिक, अमरावती, नांदेड, कोल्हापूर आदी आठ ठिकाणी प्रादेशिक न्यायसहायक प्रयोगशाळा कार्यरत आहेत. या प्रयोगशाळांवर कामाचा बोजा पडत असून अनेक प्रकरणे प्रलंबित आहेत. कामाचा भार कमी करण्यासाठी लघु न्यायसहायक वैज्ञानिक प्रयोगशाळा सुरू करण्याचा निर्णय सरकारने मागील वर्षी घेतला. त्यानंतर धुळे, चंद्रपूर, रत्नागिरी याठिकाणी लघु प्रयोगशाळा सुरू झाल्या आहेत. सोलापूरला ९ जानेवारीला प्रयोगशाळेचे उद्घाटन करण्यात येणार असून ठाण्यातील प्रयोगशाळेचा आज, सोमवारी शुभारंभ होत आहे. महासंचालक (न्यायिक आणि तांत्रिक) हेंमत नगराळे यांच्या हस्ते प्रयोशाळेचे उद्घाटन होणार आहे. यावेळी पोलिस आयुक्त विवेक फणसळकर, जिल्हाधिकारी राजेश नार्वेकर, पोलिस महानिरीक्षक निकेत कौशिक उपस्थित राहतील.