अपक्षांना ‘नारळ’, काही उमेदवार ‘फलंदाज

बॅट, किटली, विजेचा खांब, कपबशीचेही चिन्ह

म. टा. वृत्तसेवा, ठाणे

कपबशी, शिवणयंत्र, दूरदर्शन संच, इस्त्री, कॅमेरा… या वस्तूंचे ठाण्यात प्रदर्शन भरलेले नाही. तर, ठाणे महापालिका निवडणुकीतील अपक्ष उमेदवारांची निवडणूक चिन्हे आहेत. काही उमेदवारांना ‘बॅट’ही मिळाल्याने निवडणुकीच्या मैदानात कोण बाजी मारतो, याकडे सर्वांचे लक्ष लागले आहे. अपक्षांबरोबर अन्य पक्षांना वाटप केलेल्या आकर्षक चिन्हामुळे निवडणुकीची रंगत वाढणार आहे.

पालिकेच्या एकूण ३३ प्रभागांपैकी काही प्रभागात अपक्ष उमेदवारांचीही अधिक रेलचेल दिसून येते. या सर्व उमेदवारांना चिन्हांचे वाटप करण्यात आले आहे. मात्र कमळ, धनुष्यबाण, हात, घड्याळ, रेल्वे इंजिन ही प्रमुख राजकीय पक्षाची चिन्हे आहेत. मात्र अपक्ष उमेदवारांबरोबर काही अन्य पक्षांच्या उमेदवारांना मिळालेल्या चिन्हांमध्ये घरगुती वस्तूंबरोबर खाण्याच्या वस्तूंचाही समावेश आहे. काही उमेदवारांना ‘किटली’ चिन्ह मिळाले असल्याने हातात किटली घेऊन उमेदवार प्रचार करताना दिसल्यास आश्चर्य वाटण्याचे कारण नाही. निवडणुकीत ‘शिट्टी’चाही आवाज घुमणार आहे. ‘शिट्टी’ चिन्हावरही उमेदवार निवडणूक लढवत आहेत. काही अपक्ष उमेदवारांचे चिन्ह ‘नारळ’ असल्याने या उमेदवारांना मतदार नारळ देऊन घरी की पालिकेत पाठवणार का, हे निवडणुकीनंतर स्पष्ट होणार असले तरी यंदाच्या पालिका निवडणुकीच्या रणांगणात उमेदवार ‘फलंदाज’ झाले आहे. उमेदवारांना फलंदाज हे चिन्ह देखील देण्यात आले आहे. ‘आइस्क्रीम’च्या चिन्हावरही उमेदवार निवडणूक लढवत आहेत. मकरसंक्रातील पतंग उडवण्याची प्रथा आहे. गेल्याच महिन्यात हा सण होता. मात्र फेब्रुवारी मध्ये आकाशात ‘पतंग’दिसण्याची शक्यता नाकारता येणार नाही. कारण उमेदवारांचे ‘पतंग’ हे चिन्ह देखील आहे.

या चिन्हाबरोबर शटल, ब्रिफकेस, कपबशी, टेबल लॅम्प, कॅमेरा, बॅटरी टॉर्च, छताचा पंखा, फुगा, नगारा, जग, कंगवा, पाटी, गॅस सिलिंडर, रोडरोलर, हॅट, अंगठी, मेणबत्ती, चालण्याची काठी, विजेचा खांब आणि मका अशा वेगवेगळ्या चिन्हांचे वाटप यंदा उमेदवारांना करण्यात आलेले आहे. तसेच अन्य काही पक्षाचे उमेदवारांची चिन्हे बंगला, शिडी, पतंग, कोट, हत्ती अशी आहेत. अशी आकर्षक चिन्हे असलेल्या उमेदवारांच्या पारड्यात किती मते पडतात, याकडे सर्वांचे लक्ष लागले आहे.

प्रभाग ३ मध्ये सर्वाधिक उमेदवार

ठाणे महापालिका निवडणुकीत सर्वाधिक ४० उमेदवार प्रभाग क्रमांक ३ मानपाडा, मनोरमानगर, आझादनगर प्रभागात आहेत. तर प्रभाग क्रमांक २९ मध्ये सर्वात कमी १८ उमेदवार निवडणूक लढवत आहेत. अन्य प्रभागातही कमी-जास्त प्रमाणात उमेदवार निवडणुकीच्या रिंगणात आहेत.

लॉटरी पद्धतीने चिन्हे

एकच जर चिन्ह दोन उमेदवारांना हवे असल्यास अशा चिन्हाचे वाटप करताना ठाणे महापालिकेने लॉटरी पद्धतीचा अवलंब केला होता.

इंजिनवरून बॅटवर

अपक्ष उमेदवार सुधाकर चव्हाण यांनी मागील पालिका निवडणुकीत महाराष्ट्र नवनिर्माण सेनेच्या तिकिटावर निवडणूक लढवली होती. निवडूनही आले होते. यंदा मात्र अपक्ष म्हणून निवडणूक लढवत असून त्यांचे चिन्ह बॅट आहे.