म. टा. वृत्तसेवा, ठाणे
एसटी बसने बसथांब्यावर उभ्या असलेल्या बेस्ट बसला पाठीमागून दिलेल्या जोरदार धडकेत एसटी बसमधील एका प्रवाशाचे सात दात तुटले. तर इतर प्रवासी किरकोळ जखमी झाल्याची घटना रविवारी रात्री घोडबंदर रोडवर घडली. एसटी चालकाविरुद्ध कासारवडवली पोलिस ठाण्यात गुन्हा दाखल करण्यात आला आहे.
राजेश दोडके (३८ रा. मिरा रोड) असे या जखमी प्रवाशाचे नाव आहे. रविवारी रात्री टिटवाळा येथून ठाण्यात आल्यानंतर मिरा रोडला जाण्यासाठी त्याने एसटी बस पकडली. घोडबंदर रोडवरून ही बस जात असताना रात्री ११.१५ वाजता बस येथील श्रीराम रुग्णालयाजवळ आली. येथील बसथांब्यावर उभ्या असलेल्या बेस्ट बसला या एसटीने पाठीमागून जोरदार धडक दिली. या अपघातामुळे दोडके यांचे तोंड समोरील सीटच्या लोखंडी सीटवर जोरात आदळले. त्यामुळे त्यांचे सात दात तुटले. दोडके यांना तत्काळ खासगी रुग्णालयात उपचारासाठी दाखल करण्यात आले. दोडके यांच्या तक्रारीनंतर एसटी बसचालकाविरुद्ध गुन्हा दाखल करण्यात आला.