'गाव तेथे मानसोपचार' उपक्रमाद्वारे प्रयत्न
म. टा. प्रतिनिधी, ठाणे
गैरसमजुतींच्या विळख्यात अडकलेल्या स्क्रिझोफेनियासारख्या मानसिक आजारावर प्रबोधनाचे रामबाण औषध शोधण्याचा प्रयत्न मानसोपचारांकडून करण्यात येत आहे. स्क्रिझोफेनिया दिनाचे औचित्य साधत 'गाव तेथे मानसोपचार' या उपक्रमांतर्गत जिल्ह्यातील विविध गावांमध्ये आता मानसोपचार तज्ज्ञांचा वर्ग भरणार आहे.
शारिरीक व्याधींसाठी तज्ज्ञ डॉक्टरांचा सल्ला घेण्यासाठी धडपड केली जात असली तरी अद्याप मानसिक आजारांबाबतचे गैरसमज कायम आहेत. वैद्यकीयशास्त्र झपाट्याने प्रगती करत असतानाही मानसिक व्याधींसाठी तांत्रिक अथवा बुवाबाजीचा आधार घेतला जातो. अशा उपायांमुळे मूळ उपाय मिळण्यास दिरंगाई होत असल्याने स्क्रिझोफेनियासारखे आजार फोफावतात. योग्यवेळी मानसोपचारतज्ज्ञांची मदत घेतली तर मानसिक आजार बरे होऊ शकतात. या उद्देशाने राज्यभरातील १५० मानसोपचार तज्ज्ञांनी एकत्र येऊन 'गाव तेथे मानसोपचार-राज्यव्यापी मनस्वास्थ्य जनजागृती अभियान' या प्रबोधनात्मक उपक्रमाची सुरुवात केली आहे. या अभियानाच्या दुसऱ्या टप्प्यात जागतिक स्किझोफ्रेनिया दिनानिमित्ताने १ आणि २ जून रोजी ग्रामीण भागात मानसोपचारतज्ज्ञ पोहोचणार आहेत. यामध्ये ठाणे जिल्ह्यातील सहाहून अधिक ठिकाणी हा उपक्रम घेतला जाणार आहे. डॉ. शैलेश उमाटे हे भिवंडीतील पूर्ण गावात, डॉ. सुरेश पाटील विरारमध्ये उपक्रम राबविणार आहेत. त्याशिवाय डॉ. विकास देशमुख (नवी मुंबई), डॉ. अमित धर्माधिकारी (मुरबाड), डॉ. अनुजा बेंद्रे, डॉ. प्रदीप कांबळे (वाशिंद), डॉ. फेबिना अल्मेडा (कल्याण) यांच्यातर्फे विविध ठिकाणी मार्गदर्शन केले जाणार आहे. यापुढेही सातत्याने ग्रामीण भागात मार्गदर्शन करण्यासाठी मानसोपचारतज्ज्ञ सरसावले आहेत.
या मुद्द्यावर चर्चा
स्क्रिझोफेनिया म्हणजे काय?
त्याची कारणे
त्यावरील उपाय
नैसर्गिकरित्या होणाऱ्या मानसिक विकाराबाबतची अनाठायी भीती
मानसिक आजारांचे प्रकार वेगवेगळे असले तरी त्याबाबत भीती बाळगली जाते. मात्र अशी भीती रोग फोफाविण्यास कारणीभूत ठरते. उपायांसह त्या रोगाबाबत जनजागृती आवश्यक असून प्रथम टप्प्यात ग्रामीण भागांमध्ये हे प्रबोधन केले जात आहे.
डॉ. शैलेश उमाटे, मानसोपचारतज्ज्ञ