नवी मुंबई : विनयभंग केल्याप्रकरणी रबाळे पोलिस ठाण्यात गुन्हा दाखल असलेले माजी आमदार मंगेश सांगळे यांना ठाणे सत्र न्यायालयाने सोमवारी अंतरिम अटकपूर्व जामीन मंजूर केला आहे. त्यांच्या जामिनावर आता २८ मार्च रोजी सुनावणी होणार आहे. १९ वर्षीय कॉलेज तरुणीने केलेल्या तक्रारीवरून पोलिसांनी गेल्या शनिवारी हा गुन्हा दाखल केला आहे.
ऐरोली सेक्टर-८ ए येथे यश पॅराडाइस इमारतीत राहणारे मंगेश सांगळे यांनी गेल्या ऑक्टोबर महिन्यात या तरुणीला आपल्या घरी कामाच्या बहाण्याने बोलावून घेतले होते. त्यावेळी त्यांनी तिचा विनयभंग केला होता. मात्र तरुणीने स्वत:ची सुटका करून घेत आपले घर गाठले होते. सांगळे यांनी दुसऱ्या दिवशी तरुणीला मेसेज पाठवून याबाबत कुणाकडे वाच्यता न करण्याची विनंती केली होती. या प्रकारामुळे घाबरलेल्या तरुणीने परीक्षेचा कालावधी असल्याने सांगळे यांच्याविरोधात तक्रार केली नव्हती. मात्र गेल्या शनिवारी तिने रबाळे पोलिस ठाण्यात सांगळे यांच्या विरोधात तक्रार दाखल केली. त्यानुसार मंगेश सांगळे यांच्यावर विनयभंगाचा गुन्हा दाखल करण्यात आला.