म. टा. वृत्तसेवा, ठाणे
कॉल डिटेल्स रेकॉर्ड (सीडीआर) प्रकरणात बॉलिवूडमधील उदिता गोस्वामी या आणखी एका अभिनेत्रीची बुधवारी ठाणे गुन्हे शाखा युनिट एकने चौकशी केली. जबाब नोंदवल्यानंतर तिला सोडून दिले. यापूर्वी अभिनेता जॅकी श्रॉफ यांची पत्नी आयेशा यांचीही नुकतीच चौकशी करण्यात आली होती.
सीडीआरमध्ये नाव आल्यानंतर उदिताने बुधवारी सकाळी दिग्दर्शक असलेला पती मोहित सुरी याच्यासोबत गुन्हे शाखा युनिट एकच्या कार्यालयात हजेरी लावली होती. तब्बल दोन तास गुन्हे शाखेच्या अधिकाऱ्याने तिच्याकडे चौकशी केली. चौकशीत उदिताने सीडीआरबाबत काही माहिती दिल्याचे पोलिस अधिकाऱ्यांचे म्हणणे आहे. चार वर्षांपूर्वी अर्थात २०१४ मध्ये उदिता आणि मोहित यांच्यात काही वाद झाले होते. या वादातून उदिताने मोहितला नोटीस पाठवण्यासाठी सीडीआर प्रकरणातील आरोपी अॅड. रिजवान सिद्धिकी याची भेट घेतली होती. मात्र रिजवानने तिला मोहितचे कॉल डिटेल्स रेकॉर्ड दिला. आणि या सीडीआरद्वारे चौकशी करण्याबाबत सांगितले होते, असे उदिता हिचे म्हणणे असल्याचे एका पोलिस अधिकाऱ्याने सांगितले. सीडीआर नेमके काय हे आपणाला अगोदर माहितही नव्हते, असेही उदिता हिचे म्हणणे असल्याचे अधिकाऱ्याने सांगितले. सीडीआरसाठी रिजवानला किती पैसे दिले याविषयी पोलिसांनी उदिताकडे चौकशी केली. फी मधूनच संबंधित वकिलाने पैसे घेतले असल्याची बाबही तिच्या चौकशीत समोर आलेली आहे.