म. टा. प्रतिनिधी, ठाणे
घरफोडीच्या अनेक गुन्ह्यातील एका फरार आरोपीला गुन्हे शाखेच्या वागळे युनिटने अटक केली असून त्याच्या चौकशीत घरफोडीचे तीन गुन्हे उघडकीस आले आहेत. आरोपीकडून सोन्याचे दागिने आणि रोख रक्कम जप्त केली आहे. या आरोपीविरुद्ध मुंबईतही घरफोडीचे दोन गुन्हे दाखल आहेत.
दिनेश रमाशंकर यादव (३०) रा. नालासोपारा असे या आरोपीचे नाव आहे. ठाणे शहरात घरफोडीच्या गुन्ह्यात वाढ झाल्याने वरिष्ठ अधिकाऱ्यांनी गुन्हे उघडकीस आणण्याचे सूचना दिल्या होत्या. त्यानुसार गुन्हे शाखेच्या वागळे युनिटचे वरिष्ठ पोलिस निरीक्षक जयराज रणवरे आणि त्यांच्या पथकाने आरोपींचा शोध सुरू केला. कापूरबावडी परिसरात सापळा लावून दिनेशला अटक केली. कोपरी, वर्तकनगर आणि श्रीनगर पोलिस ठाण्यात दाखल असलेल्या घरफोडीच्या गुन्ह्यातील एकूण २ लाख ४३ हजारांचा मुद्देमाल पोलिसांनी आरोपींकडून हस्तगत केला आहे. तर वर्तकनगर पोलिस ठाण्यातील तीन आणि श्रीनगर पोलिस ठाण्यातील सात आणि मुंबईतील गोरेगाव पोलिस ठाण्यातील दोन अशा एकूण १२ गुन्ह्यात पोलिसांना तो हवा होता. मुंबईतील गोरेगाव आणि चारकोप भागात बऱ्याच मोठ्या घरफोड्या केल्याची कबुली आरोपीने दिली आहे.