\Bवसई-विरार पालिकेतर्फे वृक्षदिंडी सोहळा\B
म. टा. वृत्तसेवा, वसई
'वृक्षाची जोपासना हीच निसर्गाची उपासना' या राज्य सरकारच्या योजनेअंतर्गत मंगळवारी वसई विरार शहर महापालिकेच्या प्रभाग समिती 'जी' अंतर्गत वृक्ष दिंडी व वृक्ष लागवडीचा कार्यक्रम आयोजित करण्यात आला होता. केवळ वृक्षारोपण करून न थांबता लागवड करण्यात आलेली झाडे परिसरातील नागरिक तसेच विविध सामाजिक संस्थांना भविष्यातील जोपासनेकरीता दत्तक देण्यात आली.
वृक्ष लागवड, जनजागृती या कार्यक्रमांतर्गत आयोजित वृक्षदिंडीने सगळ्यांचे लक्ष वेधून घेतले. या वृक्षदिंडीमध्ये ढोलपथक, लेझीमपथक, भजन मंडळ, पालखी तसेच वृक्षरथाचा समावेश होता. वृक्षदिंडीतील सर्व उपस्थितांचे गांधीटोपी देऊन स्वागत करण्यात आले. कार्यक्रमाचे उद्घाटन प्रभाग समिती 'जी'चे सभापती कन्हैया भोईर तसेच कार्यक्रमाचे प्रमुख पाहुणे ज्येष्ठ अभिनेते अरुण नलावडे यांच्या हस्ते झाले.
वृक्षदिंडी आयोजनासाठी प्रभाग समिती 'जी'मधील नगरसेवक, सारंग मित्र मंडळ, संत निरंकारी मंडळ, प्रभाग समिती हद्दीतील विविध शाळा, महिला बचत गट, तसेच महापालिकेतील अधिकारी व कर्मचारी यांच्यासह अनेक नागरिकांचा सहभाग होता. या कार्यक्रमांतर्गत वृक्षलागवड व संवर्धनाबाबत विविध शाळांनी पथनाट्ये व भारूडे सादर केली. सर्व शाळकरी विद्यार्थ्यांना गुलाबाच्या फुलांचे वाटप करून आभार मानण्यात आले. वृक्ष संवर्धनाची प्रतिज्ञा घेऊन कार्यक्रमाची सांगता करण्यात आली.
वृक्षदिंडी प्रभाग समिती जी कार्यालयापासून सुरु झाली. वृक्षदिंडीतील समाविष्ट वृक्षांची लागवड आप्पा मैदान, नवजीवन वालीव येथे झाली. या समारंभाचे अध्यक्ष म्हणून आमदार विलास तरे, प्रमुख पाहुणे अरुण नलावडे, प्रभाग समिती जी चे सभापती कन्हैया भोईर यांच्यासमवेत इतर मान्यवरांच्या हस्ते झाडे लावण्यात आली.