प्रसूतीवेळी पॅड अडकल्याप्रकरणातील दोषी ठरेनात
शस्त्रक्रिया करणाऱ्या डॉक्टर, कर्मचाऱ्यांच्या नोंदीच नाहीत
अनेक डॉक्टर एकावेळी काम करत असल्याची सारवासारव
म. टा. प्रतिनिधी, ठाणे
डॉक्टरांच्या हलर्जीमुळे महिलेच्या शरीरात अडकलेले पॅड बाहेर काढून तब्बल दोन आठवड्यानंतरही रुग्णालयातील एकाही कर्मचाऱ्यावर कारवाई झालेली नाही. संबंधित प्रसूतीवेळी विभागात अनेक निवासी डॉक्टर तसेच परिचारिका उपलब्ध असल्याने नेमक्या कुणावर कारवाई करावी, याचा ठाव लागत नसल्याचा बचावात्मक पवित्रा रुग्णालय प्रशासनाकडून घेण्यात येत आहे. शस्त्रक्रिया करणाऱ्या डॉक्टरांची नोंद नसल्यास ही बाब अधिक गंभीर असून अशी नोंद असेल तर शोधाची गाडी नेमकी अडली कुठे, हा सवालही उपस्थित होत आहे.
प्रसुतीसाठी दाखल झालेल्या महिलेला महिनाभरानंतर गुप्तांगामध्ये काहीतरी अडकल्याची शंका येते. महिला रुग्णालयात दाखल होते... चित्रपटाची कथा वाटावी असा प्रसंग कळवा येथील शासकीय रुग्णालयात घडल्यानंतर घडामोडींना अधिक वेग आला. याबाबत रुग्णालयातील वरिष्ठ डॉक्टर, स्त्रीरोगतज्ञ असोसिएशनचे पदाधिकारी, स्वयंसेवी संस्थेचे सदस्य यांची चौकशी समिती नेमल्याचेही रुग्णालय प्रशासनातर्फे जाहीर करण्यात आले होते. मात्र दोन आठवड्यानंतरही चौकशी समितीचा शोध अद्याप संपलेला नाही. संबंधित महिलेची प्रसुती नेमकी कुणी केली, त्यावेळी कोणते डॉक्टर, परिचारिका उपस्थित होते याची नोंद नसल्याने या प्रकरणातील दोषींपर्यंत पोहोचण्यास दिरंगाई होत असल्याचे सांगितले जात आहे. रुग्णालयात दररोज मोठ्या संख्येने महिलांची प्रसुती केली जात असल्याने दिवसभर विभागात अनेकविध डॉक्टर, परिचारिका कार्यरत असतात ही बाब खरी असून दरदिवशी या विभागात कोणते कर्मचारी कार्यरत आहेत, संबंधित प्रसुती कोणत्या डॉक्टरने केली याचा लेखाजोखा रुग्णालय प्रशासनाकडे असणे अपेक्षित आहे. या नोंदींच्या आकलनानुसार या प्रकरणातील दोषांचा शोध घेणे सहज शक्य आहे. या नोंदवहीत घटना घडली त्या दिवशी तब्बल २५ कर्मचारी विभागात उपस्थित असल्यीची नोंद असली तरी ही शस्त्रक्रिया कोणी केली याबाबत नेमकी माहितीच नाही. असे असताना या महिलेच्या प्रसुतीवेळी नेमके कोणते डॉक्टर्स आणि परिचारिका उपस्थित होत्या यांची माहिती हाती लागत नसल्याचे रुग्णालय प्रशासनातर्फे सांगण्यात आले आहे. ही माहिती नसल्याने संबंधित घटनेत दोषी ठरवित कुणाला शिक्षा करायची हा प्रश्न अद्याप सुटलेला नाही. घटना घडल्यानंतर तीन निवासी डॉक्टरांना संशयित म्हणून सक्तीच्या सुट्टीवर पाठविण्यात आले. मात्र अद्याप एकाही कर्मचाऱ्याचा दोष सिद्ध झालेला नाही. संबंधित महिलेलाही डॉक्टरांची ओळख पटलेली नाही. मात्र प्रसुतीवेळी महिलेची नाजूक परिस्थिती लक्षात घेता तिच्यावर अवलंबून राहण्यापेक्षा रुग्णालयात असलेल्या नोंदी अधिक महत्त्वाच्या आहेत. तक्रार करत आलेल्या महिलेची तपासणी केल्यानंतर त्यातून पॅड बाहेर काढल्याची कबुली रुग्णालयातर्फे देण्यात आली असतानाच त्यानंतरही चौकशीला वेग आला नसल्याने रुग्णालयाचा हा बचावात्मक पवित्रा यापुढेही रुग्णांसाठी धोकादायक ठरणार असे दिसते.
अद्याप चौकशी समितीचा अहवाल प्रसिद्ध झालेला नाही. त्याचा अभ्यास केल्यानंतर योग्य निष्कर्ष काढता येईल, मात्र घटना घडताना विभागात अनेक डॉक्टर, कर्मचारी उपस्थित असल्याने नेमका दोषी कोण याची माहिती अद्याप मिळालेली नाही. संबंधित महिलेची प्रकृती सध्या उत्तम असून यापुढे असा प्रकार होऊ नये यासाठी रुग्णालयातील नियमांमध्ये बदल करण्यात आले आहेत.
डॉ. संध्या खडसे, अधिष्ठाता