खाडीचे रूप पालटणार!

आदित्य बिवलकर, डोंबिवली

कल्याण-डोंबिवलीमध्ये लोकसंख्येच्या तुलनेत मनोरंजनाच्या मोकळ्या जागा तसेच, हिरवळ कमी आहे. शहराच्या सीमेलगतची खाडी व त्यानजीकचा परिसर प्रदूषणग्रस्त आहे. त्यामुळे स्थानिक रहिवासी खाडीपरिसराकडे फिरकत नाहीत. या खाडी किनाऱ्याचा विकास व्हावा, या हेतूने कल्याण डोंबिवली महानगरपालिका प्रयत्नशील असून मनोरंजन केंद्र आणि पर्यटनाच्या दृष्टीने खाडी किनाऱ्याचा विकास करण्यात येणार आहे. त्यासाठी लवकरच निविदा प्रसिद्ध करण्यात येणार आहे.

कल्याण डोंबिवली महानगरपालिका क्षेत्राला जवळपास ३२ किमी क्षेत्राचा खाडीकिनारा लाभला आहे. या किनाऱ्यावरील जागेचा वापर महानगरपालिकेद्वारे मनोरंजन केंद्रासाठी करण्यात येणार आहे. विस्तीर्ण खाडीकिनाऱ्याचा वापर व्हावा आणि सर्वसामान्यांना चांगली सुविधा मिळावी, यासाठी महानगरपालिकेने या प्रस्तावाला मंजुरी दिली आहे.

खाडीपरिसराचे सुशोभिकरण करण्यात येणार असून हा भाग हिरवागार करण्यात येणार आहे. खाडी किनाऱ्यालगत सायकलिंगसाठी स्वतंत्र ट्रॅक उभारण्यात येणार असून ज्येष्ठ नागरिकांसाठी ‘जॉगर्स पार्क’ बांधण्यात येणार आहेत. या संपूर्ण परिसरामध्ये उपाहारगृहांची निर्मिती करण्यात येणार आहे. याशिवाय, खाडीपरिसराचा काही भाग हिरवळ आणि वृक्षारोपणासाठी आरक्षित ठेवण्यात येईल. ही योजना प्रत्यक्षात आणण्यासाठी तज्ज्ञ मंडळींची समिती स्थापन केली जाणार असून विशेष अधिकाऱ्याची नियुक्ती महानगरपालिकेद्वारे केली जाणार आहे. सर्वसामान्यांसाठी मनोरंजन केंद्र उभारावे आणि चांगल्या सुविधा उपलब्ध करून द्याव्यात, यासाठी महानगरपालिकेने हा उपक्रम हाती घेतला असल्याचे सिटी इंजिनीअर प्रमोद कुलकर्णी यांनी ‘मटा’ला सांगितले. सुविधांचा पाऊस

खाडी किनाऱ्याचे सुशोभिकरण केल्यानंतर महानगरपालिकेद्वारे येथे अनेक सुविधा सुरू करण्यात येणार आहेत. खाडीकिनाऱ्यालगतच्या परिसरामध्ये कलादालन, बगीचा, बाजारपेठ यांची निर्मिती करण्यात येणार आहे. तसेच, पार्किंगची व्यवस्था, प्रदर्शनासाठी ओपन एअर प्रदर्शन मंच, कलादालन येथे उभारण्यात येणार आहे. स्मार्ट सिटीच्या दुसऱ्या टप्प्याच्या प्रस्तावामध्ये महानगरपालिकेद्वारे याचा समावेश करण्यात आला आहे.