नामकरणाची लगीनघाई

म. टा. वृत्तसेवा, कल्याण : महापालिका क्षेत्रात तयार होणारे रस्ते, चौक, गल्ल्या यांना स्थानिक नगरसेवकांकडून आपल्या नातेवाईकांची नावे देण्याची चढाओढ लोकप्रतिनिधींचा कार्यकाळ संपण्याच्या आधीच्या महासभेत नेहमीच रंगते. कल्याण-डोंबिवली महापालिका नगरसेवकांचा कार्यकाल १० नोव्हेंबर रोजी संपत आहे. तत्पूर्वी, आपल्या प्रभागातील चौक, रस्ते, गल्ल्यांना आपल्या नातेवाईकांची नावे देण्यासाठी लोकप्रतिनिधींकडून प्रयत्न सुरू असून ६ नोव्हेंबर रोजी होणाऱ्या महासभेत तब्बल ६५ नामकरणाचे प्रस्ताव लोकप्रतिनिधींकडून देण्यात आले आहेत.

कल्याण-डोंबिवली महापालिकेच्या लोकप्रतिनिधींचा कार्यकाल १० नोव्हेंबर रोजी संपत असून करोना साथरोग काळामुळे अद्याप पालिका निवडणुकीची तयारी करण्यात आलेली नाही. त्यातच विद्यमान महापालिका क्षेत्रातून १८ गावे वगळण्यात आल्यामुळे प्रभाग रचना बदलावी लागणार असल्यामुळे महापालिकेच्या निवडणुका सहा महिने तरी लांबण्याची शक्यता आहे. महासभेच्या मंजुरीने केली जाणारी कामे रखडण्याची शक्यता असल्याने प्रशासनाने अखेरच्या ६ नोव्हेंबरला होणाऱ्या महासभेत तब्बल १४८ प्रस्ताव पटलावर ठेवले असून यात शासनाकडून प्रतिनियुक्तीवर आलेल्या अधिकाऱ्यांची माहिती देणाऱ्या आणि करोना साथरोग नियंत्रणसाठी केलेल्या उपाययोजनांवर करण्यात आलेल्या खर्चाच्या प्रस्तावाचा समावेश आहे.

विद्यमान नगरसेवकांनी आपल्या प्रभागातील चौक आणि रस्त्यांना आपल्या नातेवाईकांची नावे देण्यासाठीचे प्रस्ताव दिले आहेत. एकाच चौकाला किंवा रस्त्याला पाच वर्षांत जो नगरसेवक निवडून येईल त्याच्या नातेवाईकांची नावे पुन्हा दिली जात असल्यामुळे हा चौक नेमका कोणत्या नावाने ओळखायचा, असा प्रश्न नागरिकांना पडतो. मात्र, त्याच्याशी कोणतेही देणेघेणे नसलेल्या नगरसेवकाकडून नामकरणाचे प्रस्ताव पुन्हा पुन्हा महासभेसमोर धाडले जातात आणि अखेरच्या महासभेत विद्यमान महापौरांकडून हे प्रस्ताव मंजूर करत नामकरणाला परवानगी दिली जाते.