वाचावे नेटके हिंदी, इंग्रजी!

सार्वजनिक वाचनालयाचा स्वतंत्र हिंदी, इंग्रजी विभाग

ashish.pathak@timesgroup.com

@ashishpMT

हिंदी व इंग्रजी साहित्याचे विश्व प्रगल्भ आणि त्याचा आवाका प्रचंड असला तरी काहीशा संकुचित वृत्तीमुळे मराठी वाचकांनी ते अजूनही आपलेसे केलेले दिसत नाहीत. या साहित्याच्या चिंतनानंतरच त्यातील वैविध्य उमगते. या जाणिवेतून कल्याण येथील सार्वजनिक वाचनालयाने आता हिंदी व इंग्रजी भाषांमधील साहित्याचा स्वतंत्र विभाग स्थापन करण्याचा निर्णय घेतला आहे. जूनअखेर रामबाग येथील अलरझा इमारतीत हा नवा विभाग सुरू होत आहे.

निदा फाजली, प्रेमचंद, रश्मी बन्सल, हरिवंशराय बच्चन, महादेवी वर्मा, निरज, जवाहरलाल नेहरु, दीप्ती नवल, अमृता प्रितम, सुधा मूर्ती, चेतन भगत, देवदत्त पटनायक, शरद जोशी (हिंदी व्यंगकार ), लिओ टॉलस्टॉय, जेन ऑस्टीन, जेम्स चेस आणि गुलजार… या सर्वांनीच आपल्या समृद्ध लेखणीने देश-परदेशातील वाचकांना गवसणी घातली. त्यांचा लेखन ठेवा उपलब्ध असला तरी मराठी वाचक अभावानेच त्याकडे वळताना दिसतात. जीवन अधिकाधिक समृद्ध करण्यासाठी मराठी प्रमाणेच अन्य भाषांतील हे साहित्य अभ्यासणाची गरज आहे. त्यामुळेच कल्याण येथील सार्वजनिक वाचनालयाने आता हिंदी व इंग्रजी भाषांतील पुस्तकांसाठी स्वतंत्र विभाग सुरू करण्याचा निर्णय घेतला आहे.

रामबाग परिसरातील अलरझा इमारतीत वाचनालय हा स्वतंत्र विभाग सुरू करेल. विशेष म्हणजे त्यासाठी अवघी २५ रुपये मासिक फी असल्याची माहिती वाचनालयाचे अध्यक्ष राजीव जोशी यांनी दिली. येथील प्रसिद्ध हिंदी कादंबरीकार सूरजप्रकाश यांनी त्यांच्याकडील हिंदी पुस्तकांचा खजिना या विभागासाठी दिला आहे. त्यामध्ये वाचनालयातर्फे असंख्य पुस्तकांची भर घालण्यात आली आहे. या विभागाचे कामकाज कम्प्युटरच्या साह्याने केले जाणार असून जूनअखेर तो सुरू व्हावा, यासाठी सध्या पुस्तकांच्या नोंदणीचे काम सुरू आहे.

हा विभाग सुरू झाल्यावर शिवाजी चौक येथील मुख्य शाखेत केवळ मराठी पुस्तकेच उपलब्ध असतील. सध्याची हिंदी व इंग्रजी पुस्तके रामबाग येथील या नव्या शाखेत हलवण्यात आल्यावर रिकाम्या जागेत नवी मराठी पुस्तके वाचकांना दिली जातील.

वाचक सभासदत्व

सार्वजनिक वाचनालयाचा सभासद होण्यासाठी एखाद्या इच्छुकाने अर्ज केला की तो वाचनालयाच्या कार्यकारिणीसमोर मंजुरीसाठी ठेवावा लागतो. काहीवेळा या प्रक्रियेत बराच कालावधी लागतो. परंतु वाचक जोडणे हा वाचनालयाचा मुख्य उद्देश असल्याने आता नव्या विभागात ही वेळखाऊ प्रक्रिया बंद करून तिथे झटपट सभासदत्व दिले जाणार आहे.