स्कायवॉक पाडणार?

केडीएमसीच्या हालचाली; नियोजनातील अभाव चव्हाट्यावर

म. टा. प्रतिनिधी, ठाणे

एमएमआरडीएने कोट्यवधी रुपये खर्च करून कल्याण स्टेशन परिसरातील वाहतुकीच्या नियमनासाठी उभारलेला पूर्वेकडील स्कायवॉकचे काम अद्याप अर्धवट आहे. हा स्कायवॉक मार्च २०१८पर्यंत पूर्ण होण्याची शक्यता आहे. त्याचवेळी याच प्रकल्पाचा भाग असलेला पश्चिमेकडील स्कायवॉक मात्र पाडण्याची तयारी केडीएमसीने चालवली आहे. यानिमित्ताने पालिकेचा नियोजनातील अभाव पुन्हा चव्हाट्यावर आल्याची टीका होत आहे.

एमएमआरडीएने सन २०१०च्या अर्थसंकल्पामध्ये स्कायवॉकसाठी तब्बल ६०० कोटी रुपयांची तरतूद केली होती. त्यावेळी एमएमआरडीएचे आयुक्त रत्नाकर गायकवाड यांनी कल्याण स्टेशन परिसराची प्रत्यक्ष पाहणी करून प्रदीर्घ स्कायवॉकला मंजुरी दिली होती. त्यासाठी रेल्वे, एमएमआरडीए व केडीएमसी या तिघांनीही मंजुरी दिली होती. एमएमआरडीएने निधीची तरतूद केल्याने महत्त्वाचा अडथळा दूर झाला व केडीएमसीने या प्रकल्पाची अंमलबजावणी सुरू केली. पश्चिमेकडील प्रकल्प तीन वर्षांत पूर्ण झाला, पण आता सहा वर्षे उलटल्यावरही पूर्व बाजूकडील स्कायवॉक अडथळ्यांमध्ये अडकला आहे.

पूर्व बाजूच्या स्कायवॉकचे दोन टप्पे आहेत. स्टेशन ते सिद्धार्थनगरपर्यंतचा पहिला टप्पा आता पूर्ण झाला. परंतु त्यानंतरच्या अखेरच्या टप्प्यात सिद्धार्थनगर ते गणपती चौक हा स्कायवॉक अर्धवटच राहिल्याने या प्रकल्पाचा फारसा फायदा कल्याण पूर्व वासीयांना होऊ शकलेला नाही. वास्तविक पश्चिमेपेक्षा पूर्व बाजूला स्कायवॉकची गरज जास्त आहे. कारण याच भागातून ये-जा करताना लाखो नागरिकांना दररोज रेल्वेरूळ ओलांडावा लागतो. तसेच पश्चिमेला थेट रेल्वेरूळांपर्यंत गाड्यांची वाहतूक केली जाऊ शकते, पण रूळामुळे पूर्वेकडे गाड्या दूर अंतरावरच उभ्या कराव्या लागतात. त्यांच्या पार्किंगसाठीही या भागात जागा नाही. म्हणूनच पूर्व बाजूकडे स्कायवॉक केव्हा पूर्ण होणार, याकडे सर्वांचे लक्ष लागले असताना या कामासाठी किमान मार्च २०१८पर्यंत वाट बघावी लागेल, असा अंदाज पालिका प्रशासनाकडून वर्तवला जात आहे.

स्कायवॉकचा अडथळा

पूर्व व पश्चिमेकडील स्कायवॉक हा सॅटिस प्रकल्पाचा भाग आहे. सॅटिस पूर्ण नसताना पश्चिमेकडील स्कायवॉक पाडण्याच्या हालचालींना वेग आला आहे. एमएमआरडीएकडूनच आता कल्याण स्टेशन वाहतूक सुधारणा प्रकल्प राबवला जाणार आहे. त्यामध्ये पश्चिमेकडील स्कायवॉक अडथळा ठरत असल्याचे दिसून येत आहे. या प्रकल्पाचा आराखडा सप्टेंबरअखेर अंतिम केला जाईल. त्यावेळी स्कायवॉक पाडावा लागेल की नाही, याबाबत निश्चित निर्णय घेतला जाईल. स्कायवॉक पाडण्याचा निर्णय झालाच तर एकूण सॅटिस पूर्ण होण्याआधीच तो पाडावा लागण्याची स्पष्ट कल्पना प्रशासन व पालिकेतील सत्ताधाऱ्यांना आली आहे. परंतु त्यावरून टीकेचे धनी होण्याची कोणाची इच्छा नसल्याने याबाबत कमालीची गोपनीयता पाळली जात आहे.