काय आहे नेवाळी विमानतळ जागेचा वाद?

मटा ऑनलाइन वृत्त । कल्याण/अंबरनाथ

नेवाळी येथील विमानतळाच्या जागेवरून शेतकऱ्यांनी अचानक सुरू केलेल्या उग्र आंदोलनामुळं सरकारची झोप उडाली आहे. एकाएकी इतक्या तीव्रतेनं पुढं आलेल्या या वादाचं मूळ स्वातंत्र्यापूर्वीच्या एका निर्णयात आणि नंतरच्या प्रशासकीय उदासीनतेत दडलं आहे.

दुसऱ्या महायुद्धाच्या काळात संरक्षण खात्याने नेवाळी येथील १६०० एकर जागा स्थानिक शेतकऱ्यांकडून ताब्यात घेतली होती. युध्दकाळात इथे विमानांसाठी धापपट्टीही तयार करण्यात आली होती. केंद्रीय संरक्षण विभागाची या जागेवर मालकी असली तरी त्याकडे त्यांचे दुर्लक्ष झाले होते. त्यामुळे या सरकारी जागेवर मोठ्या प्रमाणात अतिक्रमणे सुरू झाली असून भू- माफियांनी अनेक एकर जागा हडप केली आहे. काही जणांचा इथे शेती करत असल्याचाही दावा आहे. ही अतिक्रमणे रोखून जागा संरक्षित करण्यासाठी सर्वेक्षण करून देण्याची मागणी संरक्षण विभागाने जिल्हाधिकारी कार्यालयाला काही वर्षांपूर्वी केली आहे. मात्र, स्थानिक शेतकऱ्यांची बाजू घेत राजकीय नेत्यांनी वारंवार या सर्वेक्षणात विघ्न आणले आहे. वास्तविक या जमिनीबाबतची सर्व माहिती आणि सातबारा पब्लिक डोमेनवर उपलब्ध आहे. मात्र, शेतकरी, भूमिपुत्रांच्या नावाखाली सर्वेक्षण रोखून ठेवण्याचे प्रकार करतात. दोन वर्षांपूर्वी तत्कालीन जिल्हाधिकारी अश्विनी जोशी यांनी सरकारी जागा अतिक्रमणांपासून वाचविण्यासाठी आक्रमक पवित्रा घेतला होता.

नवी मुंबईतल्या प्रस्तावित विमानतळाऐवजी कल्याणच्या नेवाळी भागात विमानतळ उभारण्याची हालचाली सरकारने सुरू केल्याचे सांगितले जात असले तरी नेवाळी येथे आंतरराष्ट्रीय दर्जाच्या विमानतळाची उभारणी अशक्य आहे. या भागात भाभा ऑटॉमिक सेंटरचे अंडरग्राऊंड रिसर्च सेंटर असल्याने तिथे विमानतळासाठी परवानगी देता येणार नाही, असे केंद्रीय संरक्षण विभागाने यापूर्वीच स्पष्ट केलेले आहे. त्याशिवाय आंतरराष्ट्रीय विमानतळासाठी आवश्यक जागेपैकी निम्मी जागाही इथे उपलब्ध नाही.