सीडीसीप्रकरणी केरळमधून अटक

म. टा. वृत्तसेवा, ठाणे

पनामा देशाच्या बनावट सीडीसी प्रकरणात ठाणे गुन्हे शाखेच्या पथकाने केरळमधून एका एजंटला अटक केली. या एजंटला न्यायालयाने सात दिवसांची पोलिस कोठडी सुनावली असून अद्याप दोन एजंट फरार आहेत.

विजेश अलाकल (३७) या एजंटच्या अटकेनंतर एकूण आरोपींची संख्या पाच झाली आहे. यापूर्वी ठाणे गुन्हे शाखेने ठाण्यातून अब्दुल्ला हकीम, विजयन पिल्ले आणि अलीम मुसा यांना अटक केली होती. त्यानंतर बनावट सीडीसी छापणारा दिनेश शंकर रौधळ याला कर्जतमधून अटक करण्यात आली. सीडीसी रॅकेटमध्ये केरळच्या तीन एजंटची नावे चौकशीत समोर आली होती. त्यामुळे गुन्हे शाखेचे सहाय्यक पोलिस निरीक्षक संदीप बागुल यांचे पथक एर्नाकुलममध्ये गेले होते. चौकशीत केरळमधील काही तरुणांची फसवणूक झाल्याचे निष्पन्न झाले. तेथून एजंट विजेशला घेऊन गुन्हे शाखेचे पथक रविवार ठाण्यात दाखल झाले.

नोकरीचे आमिष दाखवून एका उमेदवारामागे ७० हजार रुपये असे एकूण ३६ उमेदवारांकडून केरळचे विजेशसह अन्य दोघे एजंट अशा तिघांनी २५ लाख रुपये गोळा केले. उमेदवारांचे पासपोर्ट, बायोडेटा घेऊन मुसा आणि पिल्ले यांना दिले. त्या आधारे या दोघांनी सीडीसी छापण्यासाठी रौधळला सांगितले होते.