बुंदीच्या लाडूत अळ्या

बदलापूर : गेल्या काही दिवसांपासून अंबरनाथ, बदलापूर ही दोन्ही शहरे वडापावमध्ये आढळलेल्या मृत पालीमुळे चांगलीच चर्चेत आली आहेत. तोच बदलापुरात एका मिठाईच्या दुकानात बुंदीच्या लाडूत एका ग्राहकाला अळ्या आढळल्याची धक्कादायक घटना समोर आली आहे.

वांगणी येथे राहणारे किरण मेढेकर हे गुरुवारी संध्याकाळी बदलापूरच्या कात्रप भागात राहणारे त्यांची मित्र शशांक सिनलकर यांच्या घरी येत होते. त्यांनी मधुरम स्वीट्स नावाच्या दुकानातून अर्धा किलो बुंदीचे लाडू विकत घेतले. मात्र घरी गेल्यावर लाडूचा बॉक्स उघडल्यावर काही लाडूत अळ्या असल्याचे त्यांच्या निदर्शनास आले. त्यामुळे संतापलेल्या किरण यांनी मधुरम स्वीट्स दुकान गाठत लाडूतील अळ्यांबाबत दुकानदाराला जाब विचारला. यावेळी काजूमधून या अळ्या लाडूत गेल्याची शक्यता असल्याचे सांगत दुकानदार रमेश त्रिवेदी याने जबाबदारी झटकण्याचा प्रयत्न केला. तसेच तक्रारदार किरण मेढेकर आणि शशांक सिनलकर यांनीच आपल्याकडे २० हजार रुपयांची खंडणी मागितल्याचा आरोप दुकानदार रमेश त्रिवेदी यांनी केला आहे.