बोगस दावे करणारे वकील, एजंट अटकेत

एसटी अपघात नुकसानभरपाईच्या वादाचे प्रकरण

म. टा. वृत्तसेवा, ठाणे

बनावट कागदपत्रांद्वारे जखमी प्रवाशांना नुकसानभरपाई मिळावी, यासाठी ठाणे मोटार अपघात दावा प्राधिकरणाकडे तब्बल सव्वाकोटींचे २७ बोगस दावे दाखल करणाऱ्या वकीलासह एजंटला ठाणे नगर पोलिसांनी अटक केली आहे.

अॅड. उमाशंकर विश्वकर्मा (४७ रा. म्हाडा कॉलनी, मुलुंड) आणि एजंट गणपती लिखार (५५ रा. कल्याण) अशी या आरोपींची नावे आहेत. २०१६ मध्ये शहापूर तालुक्यात एसटीचा अपघात झाला होता. या अपघातात ३० प्रवासी किरकोळ जखमी झाले होते. ठाण्यातील सिव्हिल रुग्णालयात उपचार घेणारे ११ प्रवाशांनाही दोन दिवसांच्या उपचारानंतर घरी सोडण्यात आले होते. मात्र चालू वर्षाच्या जानेवारीमध्ये २७ प्रवाशांचे नुकसान भरपाईचे दावे ठाणे मोटार अपघात दावा प्राधिकरणाकडे दाखल करण्यात आले. सव्वा कोटींचे एकूण २७ दावे होते. मात्र एसटीच्या ठाणे विभागाचे सुरक्षा आणि दक्षता अधिकारी एस. ए. पाखरे यांनी याबाबत चौकशी केली असता सर्व दावे बोगस असल्याची बाब समोर आली. आरोपींनी बनावट डिस्चार्ज कार्ड बनवले होते.

मूळात सिव्हिल रुग्णालयात जखमी प्रवासी एक, तीन किंवा सहा महिने उपचारासाठी दाखलच नव्हते. डिस्चार्ज कार्डच्या आधारे डिसॅबिलिटी प्रमाणपत्रेही एका डॉक्टरकडून बनवून घेतल्याच्या बाबी दक्षता विभागाच्या चौकशीत समोर आल्यानंतर खळबळ उडाली होती. या प्रकरणी ठाणेनगर पोलिस ठाण्यात गुन्हा दाखल करण्यात आला होता. पोलिसांनी वकील उमाशंकर याच्यासह एजंट गणपती या दोघांना अटक केली आहे.

या प्रकरणात एका डॉक्टरकडे पोलिसांची चौकशी सुरू आहे. हा डॉक्टरही या गुन्ह्यात आरोपी असल्याची माहिती पोलिसांनी दिली. मात्र अद्याप त्याला अटक झालेली नाही. दरम्यान नुकसान रपाईचे बोगस प्रकरण समोर आल्यानंतर यापूर्वीच्या दाव्यांचीही एसटीच्या सुरक्षा आणि दक्षता विभागाकडून चौकशी करण्यात येत आहे.