म. टा. वृत्तसेवा, वसई
उत्तर कोकण मोडी लिपी मंडळ पालघरअंतर्गत इतिहास संशोधनपर व्याख्यानमालेच्या तिसऱ्या सत्राचे आयोजन करण्यात आले होते. यावेळी वसई परिसरातील पोर्तुगीजकालीन गडकोटांची स्थिती ऐतिहासिक कागदपत्रांच्या आधारे इतिहास मार्गदर्शन करण्यात आले.
न्यू इंग्लिश शाळेत सदर मार्गदर्शनपर व्याख्यान घेण्यात आले. या उपक्रमात इतिहास अभ्यासक डॉ. श्रीदत्त राऊत यांनी विविध विषयांवर संशोधनपर तपशील सादर केला. 'वसई प्रांतातील गौरवशाली गडकोट व १७, १८व्या शतकातील मोडी कागदपत्रे' हा उपक्रमाचा विषय होता. मार्गदर्शनपर व्याख्यानासोबतच प्रश्न-उत्तरे परिसंवाद घेण्यात आला. वसई परिसरातील १७, १८व्या शतकातील गडकोटांच्या ऐतिहासिक कागदपत्रांबाबत राऊत यांनी चिकित्सक तपशील सादर करून मार्गदर्शन केले. वसई परिसरातील पोर्तुगीजकालीन गडकोटांची स्थिती दर्शवणारे नकाशे दाखवण्यात आले. यावेळी आगाशी बंदर कोट, सायवान कोट, सोपारा नगरी कोट, राजावळी गोखीवरे चौकी, निर्मळ सुळेश्वर गोशिळा, वसई प्रांतातील गडकोटांची निश्चित संख्या, गडकोटांवर अवशेष, गडकोटांवरील संग्राम, गडकोटांबाबत विस्मृती, गडकोटांची कागदपत्रे व सध्य संशोधनाची आवश्यकता, गडकोटांवरील हरवलेली दैवते, गडकोटांचे पोर्तुगीजकालीन उल्लेख, मराठेकालीन गडकोटांची स्थिती, ब्रिटिशकालीन गडकोट इत्यादीबाबत रोचक व नकाशे पुराव्यानिशी माहिती अभ्यासकांना उपलब्ध झाली. या सत्रात वसईकरांसह ठाण्यातील बेडेकर विद्यालयाचे विद्यार्थीही सहभागी झाले होते.