वांगणीजवळ बिबट्याचा संचार

म. टा. वृत्तसेवा, बदलापूरः अंबरनाथ तालुक्यात बदलापूर, वांगणीजवळ असलेल्या कडवपाडा गावात बिबळ्याचा वावर असल्याचे समोर आले आहे. या बिबळ्याच्या पावलांचे ठसे ग्रामस्थांनी पाहिल्यानंतर त्यांनी वन विभागाला कळवले आहे. त्यानुसार वन विभागाच्या अधिकाऱ्यांनी कडवपाडा परिसराला भेट देऊन बिबळ्याच्या पावलांच्या ठशांची पाहणी केली. त्यांनी बिबळ्याच्या वावरावर शिक्कामोर्तब केले असून ग्रामस्थांना सतर्क राहण्याचे आवाहन केले आहे.

अंबरनाथ आणि मुरबाड तालुक्याच्या अंतर्गत येणाऱ्या गावांत तसेच हाजीमलंग पट्टा या भागात गेल्या काही वर्षांत सातत्याने बिबळ्याचा वावर आहे. वर्षभरापूर्वी बिबळ्याने एका आश्रमातील वासराची शिकार केली होती. याच भागापासून काही अंतरावर तीन वर्षांचा बिबळ्या उपासमारीमुळे मृत अवस्थेत आढळला होता. आता पुन्हा या भागात बिबळ्या आढळल्याचे समोर आले आहे. त्यामुळे वन विभागाने या भागात गस्त वाढवली आहे. ग्रामस्थांनाही या भागात वावर करतांना सतर्क राहण्याचे आवाहन करण्यात आले असून बिबळ्या आढळल्यास त्याला मारण्याचा प्रयत्न करू नका, असे आवाहन वन विभागाने केले आहे.

वांगणी भागात बिबळ्याचा वावर आहे, हाजीमलंग पट्ट्यातही हा बिबळ्या आढळला आहे. सावधानता म्हणून ग्रामस्थांना सतर्क राहण्याचे आवाहन केले आहे.

प्रमोद ठाकर, वनक्षेत्रपाल, बदलापूर.