निशाणी ‘अंगठा’

पालिका सभागृहात अल्पशिक्षित उमेदवारांचा भरणा

म. टा. वृत्तसेवा, ठाणे

निवडणूक लढवणाऱ्या उमेदवारांची संपत्ती, शिक्षण, त्यांच्यावर दाखल असलेले गुन्हे आदी माहितीचा तपशील यंदा मतदानकेंद्राबाहेरच लावण्यात आला होता. मतदानापूर्वी मतदारांपर्यंत ही माहिती पोहोचवण्याचा उद्देश त्यामागे होता. त्यानंतरही ठाणे महापालिकेमध्ये ६८ अल्पशिक्षित उमेदवार निवडून आले आहेत. सभागृहातील केवळ २९ उमेदवार हे उच्चशिक्षित आहेत. अल्पशिक्षित उमेदवारांमध्ये शिवसेनेच्या सर्वाधिक उमेदवारांचा समावेश आहे.

यंदाच्या निवडणुकीत सर्वच पक्षांनी उमेदवारांच्या शिक्षणाकडे कानाडोळा केला होता. शिक्षणापेक्षा पद, पैसा आणि प्रतिष्ठा असलेले उमेदवारच निवडणुकीच्या रिंगणात होते. अल्पशिक्षित उमेदवार अधिक असले तरी काही उच्चशिक्षित उमेदवारही निवडणुकीच्या रिंगणात होते. मात्र त्यातील अनेकांना दारुण पराभवाला सामोरे जावे लागले आहेत. निवडून आलेल्या उमेदवारांमध्ये कोणाचे पाचवी, सहावी, आठवी, नववी असे शिक्षण झालेले आहे. दहावी, बारावी शिक्षण असलेले उमेदवारही निवडून आले आहेत.

पक्षनिहाय विजयी उमेदवारांची संख्या

शिवसेना भाजपा राष्ट्रवादी काँग्रेस काँग्रेस एआयएमआयएम अपक्ष

चौथी ते नववी २५ ०७ १३ - १ १

दहावी ०६ ०५ १० - - -

बारावी २० ०३ ०३ - - -

पदवीपेक्षा कमी ०३ - - - - -

पदवीधर ०९ ०६ ०६ ०२ १ १

पदव्युत्तर पदवी ०२ - १ - - -

प्रोफेशन शिक्षण - - - १ - -

टेक्निकल ०२ १ - - - -

इंजिनीअर - - १ - - -

काहीच शिक्षण नाही - १

निवडणूक आयोगाने मोठ्या प्रमाणावर मतदान करा, त्याचबरोबर योग्य उमेदवारांना मतदान करा, असे आवाहन केले होते. तरीही अत्यल्प शिक्षण असलेले उमेदवार निवडून आले आहेत. हा निवाडा हे मोठे कोडे आहे.

राजेंद्र राजपूत प्राचार्य मो. ह. विद्यालय, ठाणे

अल्पशिक्षित उमेदवारांना मतदार नाकारतील, त्यावेळी राजकीय पक्ष योग्य आणि सुशिक्षित उमेदवार उभे करतील. तसेच मतदानाचा टक्का वाढणार नाही, तोपर्यंत अशीच परिस्थिती राहील.

अरविंद पंचाक्षरी, कायदेतज्ज्ञ