जीवन प्राधिकरण कर्मचाऱ्याची आत्महत्या

म. टा. वृत्तसेवा, उल्हासनगर

ठाणे येथील महाराष्ट्र जीवन प्राधिकरणाच्या प्रकल्प विभागात कार्यरत असलेले राजू शामा खैरे यांनी रविवारी सकाळी अंबरनाथ रेल्वे स्थानकावर आलेल्या गाडीखाली स्वतःला झोकून देत आत्महत्या केल्याची घटना समोर आली. त्यांच्या आत्महत्येचे कारण समजू शकलेले नाही.

अंबरनाथच्या पश्चिम भागातील खुंटवली परिसरात राहणारे राजू खैरे हे अंबरनाथ येथील महाराष्ट्र जीवन प्राधिकरण येथे मीटर वाचक म्हणून कार्यरत होते. दोन महिन्यांपूर्वी त्यांची ठाणे येथील महाराष्ट्र जीवन प्राधिकरणाच्या कार्यालयात बदली झाली होती. मात्र मागील काही दिवसांपासून ते चिंताग्रस्त असल्याचे बोलले जात आहे. रविवारी सकाळी सव्वासहाच्या सुमारास अंबरनाथ रेल्वे स्थानकातील प्लॅटफॉर्म क्रमांक एकवर खैरे उभे होते. मात्र अंबरनाथ रेल्वे स्थानकात आलेली खोपोली गाडी सुटताच राजू यांनी स्वत: त्या लोकलसमोर उडी घेतली. त्यांना उपचारासाठी रुग्णालयात दाखल केले. मात्र डॉक्टरांनी त्यांना मृत घोषित केले.