अधिकृत रिक्षास्टॅण्डची प्रतीक्षाच

अहवालानंतर दीड वर्षांनीही कार्यवाही नाही

म. टा. वृत्तसेवा, डोंबिवली

कल्याण-डोंबिवलीतील वाहतूककोंडीमुळे नागरिक व वाहनचालक मेटाकुटीला आले आहेत. रेल्वे स्टेशन परिसरातील निम्मे रस्ते, शहरातील महत्त्वाचे चौक व मोक्याच्या जागा रिक्षा स्टॅण्डने बळकावल्या आहेत. हेच बेकायदा रिक्षा स्टॅण्ड हटवण्यासाठी कल्याण आरटीओ कार्यालयाने रिक्षा स्टॅण्डचे सर्वेक्षण केले. त्यानुसार, अधिकृत रिक्षा स्टॅण्ड कुठे उभारावेत, याचा अहवाल दीड वर्षापूर्वी कल्याण-डोंबिवली महापालिकेस सादर केला. मात्र, महापालिकेने त्यावर कोणतीही कार्यवाही केलेली नाही. यामुळे अधिकृत थांब्यांचा प्रश्न रखडला आहे.

डोंबिवली शहरात बेकायदा रिक्षा स्टॅण्डचे प्रमाण जास्त आहे. यासाठी आरटीओद्वारे गेल्या वर्षी सर्वेक्षण करण्यात आले होते. आरटीओ कार्यालयाने कल्याण पश्चिमेकडे १२८, कल्याण पूर्वेकडे ४०, डोंबिवली पूर्वेकडे ७६ आणि डोंबिवली पश्चिमेकडे ६१ रिक्षा स्टॅण्ड सुचवले होते, मात्र त्यानंतर महानगरपालिकेद्वारे कोणतीच भूमिका घेण्यात आली नसल्यामुळे अनधिकृत थांबे वाढत आहेत. याबद्दल स्मरणपत्रे देऊनसुद्धा कोणतीही कार्यवाही होताना दिसत नाही. रिक्षा स्टॅण्डला जागा देण्याची जबाबदारी महापालिकेची असते. मात्र, महापालिकेकडून जागा दिली जात नाही. बेकायदा रिक्षा स्टॅण्डवरील कारवाईबद्दल आरटीओवर टीका केली जाते, त्यामुळे आरटीओ प्रशासन कोंडीत सापडले आहे.

शहरात अनधिकृत थांब्यांचे जाळे वाढत असताना मुजोर रिक्षाचालक आरटीओच्या कारवाईला विरोध करत आहेत. आरटीओने अधिकृत स्टॅण्ड सुरू करावेत, अशी मागणी रिक्षाचालक करत आहेत, मात्र त्याबद्दल अहवाल सादर करूनही महानगरपालिका कार्यवाही करत नसल्यामुळे काम खोळंबले आहे.