दादांचे कार्यकर्ते बारामतीत, मनसैनिकांचे हातावर हात; भाजप, शिंदेसेनेचे ठरेना, सगळेच संभ्रमात

ठाणे: मुख्यमंत्री एकनाथ शिंदेंचा बालेकिल्ला असलेल्या ठाण्यात महायुतीला अद्याप उमेदवार ठरवता आलेला नाही. महायुतीत ही जागा कोणत्या पक्षाला मिळणार याचाच निर्णय अद्याव झालेला नाही. त्यामुळे कार्यकर्ते अस्वस्थ झाले आहेत. लवकरात लवकर उमेदवार जाहीर करा, अशी विनंती मेटाकुटीला आलेले कार्यकर्ते नेत्यांना करत आहेत.

महायुतीचा उमेदवार २ मे रोजी जाहीर होणार असल्याचं सांगण्यात येत आहे. उमेदवार जाहीर करण्यास जितका उशीर होईल, तितके प्रचाराला दिवस कमी मिळतील, असं कार्यकर्त्यांचं म्हणणं आहे. महाविकास आघाडीकडून विद्यमान खासदार राजन विचारे रिंगणात आहेत. ठाकरेसेनेनं निष्ठावंत विचारेंना पुन्हा संधी दिली आहे. तर महायुतीच्या कार्यकर्त्यांना सर्वसामान्य ठाणेकर तुमचा उमेदवार ठरणार तरी कधी? असा प्रश्न विचारु लागले आहेत.
मतदान दोन लाख, दादांची कोणाला साथ? मुख्यमंत्री पुत्राची धाकधूक कायम, पुन्हा 'कल्याण' होणार?
आपला उमेदवार कोण असणार असा प्रश्न महायुतीमधील शिंदेसेना, भाजपचे कार्यकर्ते, पदाधिकारी आपापल्या पक्षाच्या आमदारांना, जिल्हाध्यक्षांना विचारल्यास त्यांच्याकडून उत्तर मिळत नाहीत. त्यामुळे सर्वसामान्य ठाणेकरांना उत्तरं देताना सर्वसामान्य कार्यकर्त्यांची अडचण होत आहे. वरिष्ठांनाच कल्पना नसल्यानं कार्यकर्तेही अनभिज्ञ आहेत.
काका, पुतण्याच्या संघर्षात काँग्रेसला फटका; पवारांना भावले मामा, आता अजितदादाही लागले कामाला
ठाण्यातून निवडणूक शिवसेना लढवणार की भाजप? उमेदवार भाजपचा असला तरी तो शिवसेनेच्या चिन्हावर लढणार का? उमेदवार भाजपचा आणि चिन्हही भाजपचे असल्यास मतदारांना काय सांगायचं? असे असंख्य प्रश्न महायुतीच्या कार्यकर्त्यांना पडले आहेत. या प्रश्नांची उत्तरं कार्यकर्त्यांकडे नाहीत. त्यामुळे उमेदवार जाहीर करुन सोक्षमोक्ष लावून टाका, असं कार्यकर्ते म्हणत आहेत.


ठाण्यातील उमेदवाराचा निर्णय मुख्यमंत्री एकनाथ शिंदे आणि उपमुख्यमंत्री देवेंद्र फडणवीसच घेतील, हे दोन नेतेच त्याबद्दल सांगू शकतील, असं ठाण्यातील शिवसेना, भाजपचे वरिष्ठ पदाधिकाऱ्यांचं म्हणणं आहे. ठाण्याचा उमेदवार ठरत नसल्यानं अजित पवारांच्या राष्ट्रवादीचे पदाधिकारी, कार्यकर्ते बारामतीला निघून गेलेत. ते तिथे सुनेत्रा पवारांचा प्रचार करत आहेत. तर बिनशर्त पाठिंबा देणाऱ्या मनसेच्या पदाधिकारी आणि कार्यकर्त्यांना काहीच काम राहिलेलं नाही.